«تىرشىلىگىمە ورالاتىن ءسات تاياپ قالدى»: رۋسلان بەردەنوۆ جاعدايى تۋرالى مالىمدەمە جاسادى

جۋىردا وقىس وقيعاعا تاپ بولعان شىمكەنت قالاسى اكىمىنىڭ ورىنباسارى رۋسلان بەردەنوۆ الەۋمەتتىك جەلىدە جازبا جاريالادى. ول جاعدايى جاقسارىپ كەلە جاتقانىن ايتىپ, حالىققا وقىس وقيعادان كەيىن العاشقى مالىمدەمەسىن جاريالادى, دەپ حابارلايدى qandastar.kz اقپاراتتىق پورتالى.

«قۇرمەتتى شىمكەنتتىكتەر, قادىرلى قازاقستان حالقى! مەنىڭ باسىما تۇسكەن اۋىر جاعدايدان كوپشىلىگىڭىز حاباردارسىزدار دەپ بىلەمىن. بۇل وقىس وقيعا ماعان دا, مەنىڭ وتباسىم مەن جاقىندارىما دا اۋىر تيگەنى انىق. مۇنى سوزبەن ايتىپ جەتكىزۋ وتە قيىن.  الايدا, سىناققا تولى بولعان وسى ۋاقىت ارالىعىندا ادامداردىڭ, ارىپتەستەرىمنىڭ, تامىر-تانىستارىمنىڭ جاناشىرلىعىن, قولداۋىن, تىلەكتەستىگىن سەزىندىم. تەلەفونىما تۇسكەن قوڭىراۋلار, حابارلامالار, الەۋمەتتىك جەلىدەگى تىلەۋلەس جازبالار كوڭىلىمە دەمەۋ بولعانىن, كۇش-قۋات بەرگەنىن, سەرگىتكەنىن ايتقىم كەلەدى», — دەدى بەردەنوۆ.

ول دەنساۋلىعى جاقسارىپ, كۇندەلىكتى كۇيبەڭ تىرشىلىگىنە جاقىندا ورالاتىنىن مالىمدەدى.

«مىنە, 3 اپتاعا سوزىلعان اۋرۋحاناداعى كۇندەرىم اياقتالىپ, ءوزىم دە اياقتان تۇرىپ, كۇندەلىكتى تىرشىلىگىمە ورالاتىن ءسات تاياپ قالدى. البەتتە, ءبىرىنشى اللانىڭ, سودان سوڭ دارىگەرلەرىمىزدىڭ ءجىتى باقىلاۋىنىڭ, ەم-دومىنىڭ ارقاسىندا دەنساۋلىعىم وڭالدى, قالپىنا كەلدى. وسى ۋاقىت ىشىندە مەن ەلىمىزدىڭ مەديتسيناسى كوپ ىلگەرىلەگەنىنە, شەتەلدىك كلينيكالاردان ەش كەم ەمەستىگىنە كوز جەتكىزدىم. اق حالاتتى ابزال جاندارىمىزدىڭ مەيىرىمى مەن كاسىبيلىگى دە ريزاشىلىعىمىزعا ابدەن لايىق», — دەپ رۋسلان بەردەنوۆ قولداۋ كورسەتىپ, جاناشىرلىق تانىتقاندارعا شەكسىز العىسىن ءبىلدىردى.