«Tirshiligime oralatyn sát taıap qaldy»: Rýslan Berdenov jaǵdaıy týraly málimdeme jasady

Jýyrda oqys oqıǵaǵa tap bolǵan Shymkent qalasy ákiminiń orynbasary Rýslan Berdenov áleýmettik jelide jazba jarııalady. Ol jaǵdaıy jaqsaryp kele jatqanyn aıtyp, halyqqa oqys oqıǵadan keıin alǵashqy málimdemesin jarııalady, dep habarlaıdy qandastar.kz aqparattyq portaly.

«Qurmetti shymkenttikter, qadirli Qazaqstan halqy! Meniń basyma túsken aýyr jaǵdaıdan kópshiligińiz habardarsyzdar dep bilemin. Bul oqys oqıǵa maǵan da, meniń otbasym men jaqyndaryma da aýyr tıgeni anyq. Muny sózben aıtyp jetkizý óte qıyn.  Alaıda, synaqqa toly bolǵan osy ýaqyt aralyǵynda adamdardyń, áriptesterimniń, tamyr-tanystarymnyń janashyrlyǵyn, qoldaýyn, tilektestigin sezindim. Telefonyma túsken qońyraýlar, habarlamalar, áleýmettik jelidegi tileýles jazbalar kóńilime demeý bolǵanyn, kúsh-qýat bergenin, sergitkenin aıtqym keledi», — dedi Berdenov.

Ol densaýlyǵy jaqsaryp, kúndelikti kúıbeń tirshiligine jaqynda oralatynyn málimdedi.

«Mine, 3 aptaǵa sozylǵan aýrýhanadaǵy kúnderim aıaqtalyp, ózim de aıaqtan turyp, kúndelikti tirshiligime oralatyn sát taıap qaldy. Álbette, birinshi Allanyń, sodan soń dárigerlerimizdiń jiti baqylaýynyń, em-domynyń arqasynda densaýlyǵym ońaldy, qalpyna keldi. Osy ýaqyt ishinde men elimizdiń medıınasy kóp ilgerilegenine, sheteldik klınıkalardan esh kem emestigine kóz jetkizdim. Aq halatty abzal jandarymyzdyń meıirimi men kásibıligi de rızashylyǵymyzǵa ábden laıyq», — dep Rýslan Berdenov qoldaý kórsetip, janashyrlyq tanytqandarǵa sheksiz alǵysyn bildirdi.