الەم جاڭالىقتارىجاڭالىقتار
ءتىزىم جاريالاندى: ەلىمىزدە كىمدەر اەس سالۋعا مۇددەلى?
فوتو: اشىق دەرەككوز
اەس قۇرىلىسىن سالۋعا ۇمىتكەر كومپانيالاردىڭ ءتىزىمى جاريالاندى, دەپ جازدى qandastar.kz
ەنەرگەتيكا ءمينيسترى الماسادام ساتقاليەۆتىڭ جەتەكشىلىگىمەن قازاقستان دەلەگاتسياسى رەسەيگە ىسساپارمەن بارىپ قايتتى. ۆەدومستۆونىڭ اقپاراتىنشا, بۇل ساپاردىڭ نەگىزگى ماقساتى — لەنينگرادتىق اەس-تىڭ جۇمىس تاجىريبەسىمەن تانىسۋ جانە ۆۆەر-1200 رەاكتورلارى بار 3+ بۋىن ەنەرگوبلوكتارىنىڭ تەحنولوگيالارىن زەرتتەۋ بولدى. ۆۆەر-1200 رەاكتورى – «روساتوم» مەملەكەتتىك كورپوراتسياسىنىڭ فلاگماندىق جوباسى. قازاقستاننىڭ رەسەيگە ساپارى اەس سالۋعا قاجەتتى تەحنولوگيا جەتكىزۋشىلەرمەن جۇرگىزىلگەن ديالوگتىڭ سوڭعى كەزەڭى بولدى. بۇعان دەيىن دەلەگاتسيا وڭتۇستىك كورەيا, فرانتسيا جانە قىتايعا بارىپ قايتقان ەدى.
قازىرگى تاڭدا اەس سالۋعا ۇمىتكەر رەتىندە ءتورت كومپانيا تىركەلدى: رەسەيدىڭ «روساتوم» قىتايدىڭ CNNC وڭتۇستىك كورەيانىڭ KHNP فرانتسيانىڭ EDF كومپانياسى. مينيسترلىكتىڭ مالىمەتىنشە, اەس سالۋعا ارنالعان تەحنولوگيا جەتكىزۋشىسىن تاڭداۋ بويىنشا سوڭعى شەشىم بيىل قابىلدانادى. ول ۇلتتىق مۇددەلەر, حالىقارالىق نورمالار جانە ماگاتە-ءنىڭ ۇسىنىستارى نەگىزىندە جۇزەگە اسىرىلماق.
