«توي – قازاقتىڭ قازىناسى» دەگەن — بيشارا ءسوز»: جازۋشى قانات تىلەۋحان كۇتپەگەن مالىمدەمە جاسادى

جازۋشى ءارى جۋرناليست قانات تىلەۋحان قازاق قوعامىندا تويلاردىڭ شامادان تىس كوبەيىپ كەتكەنىنە نازار اۋداردى. بۇل تۋرالى ول Instagram پاراقشاسىندا جازدى, دەپ حابارلايدى Qandastar.kz.

قانات تىلەۋحاننىڭ ايتۋىنشا, «توي — قازاقتىڭ قازىناسى» دەگەن ءسوز شىندىققا جاناسپايدى.

«توي — قازاقتىڭ قازىناسى دەگەن ءبىر بيشارا ءسوز بار. قايداعى قازىنا? قينالىپ تاپقان اقشاڭ ءبىر ساتتە جوق بولادى. سوسىن قالتاڭ بوساپ, نەسيەڭ قىسىپ, تاعى دا جەتپەي جاتادى. ءبىزدىڭ بالا كۇنىمىزدە تويدىڭ ەكى-اق ءتۇرى بولاتىن — ۇيلەنۋ تويى جانە اسكەرگە شىعارىپ سالۋ. سوڭعىسى قىزىقتى وتەتىن, ءتىپتى شاقىرماسا دا بارۋعا تىرىساتىنبىز. قازىر سۇندەت توي, ءتىلاشار, 30 جاس, 40 جاس, 45 جاس, 50 جاس — قىسقاسى, ءتۇرى سانسىز. تويعا بارىپ, شارشاپ قايتامىن. سوعان قاراماستان, تويحانالار كۇن سايىن كوبەيىپ جاتىر», — دەدى ول.

جازۋشىنىڭ بۇل پىكىرىنە الەۋمەتتىك جەلى قولدانۋشىلارى ءارتۇرلى رەاكتسيا ءبىلدىردى:

«انشىلەردىڭ عانا قازىناسى», «تولىق كەلىسەمىن», «توي — ىسىراپ», «زاماننىڭ وزىعى دا, توزىعى دا بار», «تامادالار كوڭىلدەن شىقپايدى», «بۇرىن تويدا كەدەي دە, باي دا رازى بولاتىن, قازىر باسەكە عانا» دەگەن سىندى پىكىرلەر قالدىرعان.

تاقىرىپقا اكتەر, قازاقستاننىڭ ەڭبەك سىڭىرگەن قايراتكەرى بەكجان تۇرىس تا ارالاستى. ول قانات تىلەۋحاننىڭ سوزىنە كەلىسپەيتىنىن جەتكىزدى:

«توي — قازاقتىڭ قازىناسى» دەگەندى «بيشارا ءسوز» دەپ ايتۋ — ۇلتتىق ءداستۇر مەن تانىمدى ءۇستىرت ءتۇسىنۋدىڭ بەلگىسى. تويدى كەمسىتۋ — تامىردى قيىپ, ءبۇر جارعان بايتەرەكتى «نەگە جاپىراق جايدىڭ» دەۋمەن بىردەي. ارينە, بۇگىنگى كەيبىر تويلاردىڭ جاساندى داڭعازا, ىسىراپشىل, داراقى تۇستارى بار. بىراق بۇل — تويدىڭ ەمەس, ونى ۇيىمداستىرۋشىلاردىڭ تالعامى مەن تاربيەسىنە قاتىستى ماسەلە», — دەپ جازدى ول.