«Toıda 6 saǵat otyramyz»: Dáýlet Muqaev meıramhanaǵa 200 qonaq shaqyratyndardy synap tastady

Foto: jeke qorynan

Májilis depýtaty Dáýlet Muqaev halyqty toıdy ysyrapsyz jasaýǵa shaqyrdy, dep habarlady qandastar.kz turkystan.kz-ke silteme jasap.

Ol bul týraly oıyn «Habar» arnasynyń «Talqy» baǵdarlamasynda aıtty.

«Dastarhannyń ózin qaraıyqshy. Áıteýir bári toıyp jeý kerek, tolyp turý kerek. Sodan keıin 6 saǵat otyramyz. Dastarhannan kóp jaǵdaıda tamaq artylyp qalyp, ony paketterge bólip taratady. Keıbir adamdar 2-3 paketten alyp ketedi. Er-azamattardyń ózderi dastarhan basynda áıeldermen birge jantalasyp jatady. Birinshiden, dál osy tamaqqa kelgende ysyrapshyldyqty azaıtýymyz kerek. Ekinshiden, toıǵa 300-400 adam jınaıdy. Sen olardyń bárin tanymaısyń. Toıǵa tek jaqyndar jınalýy kerek. «Ananyń, mynanyń kóńili qalmasyn», «Uıat bolmasyn», «Renjip qalmasyn» dep 200-300 adamdy jınap alamyz. Pandemııadan sabaq alýymyz kerek edi. Pandemııa kezinde meıramhananyń artqy esiginen tyǵylyp kirip, 50-80 adamǵa toı jasaǵandar boldy. Pandemııadan keıin osy úrdis saqtalyp qala ma dep oılap edim. Biraq joq, biz qaıtadan sol burynǵy toı jarysyna kirisip kettik», – dedi Dáýlet Muqaev.