توقاەۆ 3 جىلدا قازاقستاننىڭ قالاي وزگەرگەنىمەن ءبولىستى

فوتو: اقوردا

قاسىم-جومارت توقاەۆتىڭ قاتىسۋىمەن ۇلتتىق قۇرىلتايدىڭ IV وتىرىسى باستالدى, دەپ حابارلايدى qandastar.kz

جيىنعا قۇرىلتاي مۇشەلەرى مەن باسقا دا دەلەگاتتار قاتىسىپ وتىر. قازىرگى ۋاقىتتا سپيكەرلەر ءسوز الدى.

مەملەكەت باسشىسى ەڭ الدىمەن بارشا جينالعان قاۋىمدى امال كۇنىمەن قۇتتىقتادى.

«قىستان امان-ەسەن شىعىپ, اعايىن-باۋىرمەن كورىسۋ – ەجەلدەن كەلە جاتقان اتا ءداستۇرىمىز. بۇل كۇن – ءاز-ناۋرىزدىڭ باستاۋى. ەلىمىزدىڭ ءتول مەرەكەسى بيىل دا قاسيەتتى ورازا ايىنا ورايلاس كەلىپ وتىر.

قاستەرلى مەيرامدارىمىز حالقىمىزدى يگى امالدار جاساۋعا ۇندەيدى. اسىل قاسيەتتەرىمىزدى كەڭىنەن دارىپتەيدى. قۇرىلتايدىڭ ۇلىق مەرەكەلەرمەن قاتار ءوتىپ جاتقانى – جاقسىلىقتىڭ نىشانى», — دەدى توقاەۆ.

سونىمەن قاتار, ەلىمىزدى تۇبەگەيلى جاڭعىرتۋ ءۇشىن اۋقىمدى رەفورما جاسايتىنىن ەسكە سالدى.

ء«ۇش جىلدىڭ ىشىندە قازاقستان جاڭا تۇرپاتتى ەل بولدى. ساياسي رەفورمالار جان-جاقتى وزگەرىستەر جاساۋعا مۇمكىندىك بەردى. جالپىحالىقتىق رەفەرەندۋم ارقىلى اتا زاڭعا تۇزەتۋلەر ەنگىزىلدى. پارلامەنتتىڭ قۇزىرى كەڭەيدى, ۇكىمەتتىڭ جاۋاپكەرشىلىگى ارتتى. ادام قۇقىقتارىن قورعاۋ جۇيەسى جاقساردى. كونستيتۋتسيالىق سوت قۇرىلدى. شەشىم قابىلداۋ ۇدەرىسىنە ازاماتتاردىڭ بەلسەنە قاتىسۋىنا جول اشىلدى. باسقا دا باعىتتاردا ماڭىزدى رەفورمالار جاسالدى.

جەرگىلىكتى بيلىك تۇبەگەيلى جاڭعىرتىلدى. ءۇش جىلدان استام ۋاقىت ىشىندە اۋىل اكىمدەرىنىڭ 72 پايىزى جاڭاردى. ونىڭ ۇشتەن ءبىرى – بۇرىن مەملەكەتتىك قىزمەتتە بولماعان ازاماتتار. ءبىر سوزبەن ايتساق, ايماقتارداعى اتقارۋشى بيلىككە جاڭا ادامدار كەلىپ جاتىر.

پيلوتتىق جوبا رەتىندە اۋداندار مەن وبلىستىق ماڭىزى بار قالالاردىڭ 45 اكىمى سايلاندى. بيىلدان باستاپ بارلىق اۋدان اكىمدەرىن حالىق تىكەلەي سايلايتىن بولادى. ءتۇرلى دەڭگەيدەگى ءماسليحات سايلاۋى وكىلدى بيلىك ورگاندارىنىڭ جۇمىسىنا تىڭ سەرپىن بەردى. وبلىستىق جانە اۋداندىق ءماسليحات دەپۋتاتتارىنىڭ 90 پايىزى ءبىر مانداتتى وكرۋگتەن, ياعني تىكەلەي داۋىس بەرۋ ارقىلى سايلاندى. بيلىك جۇيەسىندە مۇنداي اۋقىمدى وزگەرىس بۇرىن-سوڭدى بولمادى», — دەيدى مەملەكەت باسشىسى.