Toqaev 3 jylda Qazaqstannyń qalaı ózgergenimen bólisti

Foto: Aqorda

Qasym-Jomart Toqaevtyń qatysýymen Ulttyq quryltaıdyń IV otyrysy bastaldy, dep habarlaıdy qandastar.kz

Jıynǵa Quryltaı músheleri men basqa da delegattar qatysyp otyr. Qazirgi ýaqytta spıkerler sóz aldy.

Memleket basshysy eń aldymen barsha jınalǵan qaýymdy Amal kúnimen quttyqtady.

«Qystan aman-esen shyǵyp, aǵaıyn-baýyrmen kórisý – ejelden kele jatqan ata dástúrimiz. Bul kún – Áz-Naýryzdyń bastaýy. Elimizdiń tól merekesi bıyl da qasıetti Oraza aıyna oraılas kelip otyr.

Qasterli meıramdarymyz halqymyzdy ıgi amaldar jasaýǵa úndeıdi. Asyl qasıetterimizdi keńinen dáripteıdi. Quryltaıdyń ulyq merekelermen qatar ótip jatqany – jaqsylyqtyń nyshany», — dedi Toqaev.

Sonymen qatar, elimizdi túbegeıli jańǵyrtý úshin aýqymdy reforma jasaıtynyn eske saldy.

«Úsh jyldyń ishinde Qazaqstan jańa turpatty el boldy. Saıası reformalar jan-jaqty ózgerister jasaýǵa múmkindik berdi. Jalpyhalyqtyq referendým arqyly Ata zańǵa túzetýler engizildi. Parlamenttiń quzyry keńeıdi, Úkimettiń jaýapkershiligi artty. Adam quqyqtaryn qorǵaý júıesi jaqsardy. Konstıtýııalyq sot quryldy. Sheshim qabyldaý úderisine azamattardyń belsene qatysýyna jol ashyldy. Basqa da baǵyttarda mańyzdy reformalar jasaldy.

Jergilikti bılik túbegeıli jańǵyrtyldy. Úsh jyldan astam ýaqyt ishinde aýyl ákimderiniń 72 paıyzy jańardy. Onyń úshten biri – buryn memlekettik qyzmette bolmaǵan azamattar. Bir sózben aıtsaq, aımaqtardaǵy atqarýshy bılikke jańa adamdar kelip jatyr.

Pılottyq joba retinde aýdandar men oblystyq mańyzy bar qalalardyń 45 ákimi saılandy. Bıyldan bastap barlyq aýdan ákimderin halyq tikeleı saılaıtyn bolady. Túrli deńgeıdegi máslıhat saılaýy ókildi bılik organdarynyń jumysyna tyń serpin berdi. Oblystyq jáne aýdandyq máslıhat depýtattarynyń 90 paıyzy bir mandatty okrýgten, ıaǵnı tikeleı daýys berý arqyly saılandy. Bılik júıesinde mundaı aýqymdy ózgeris buryn-sońdy bolmady», — deıdi Memleket basshysy.