توقاەۆ: ادىلەتتى قازاقستاندى كەمەڭگەر كوسەمدەر ەمەس, قاراپايىم ەڭبەككەرلەر قۇرادى

فوتو: gov.kz

مەملەكەت باسشىسى باق قىزمەتكەرلەرىن ماراپاتتاۋعا ارنالعان جيىندا سويلەگەن سوزىندە بۇقارالىق اقپارات قۇرالدارىنىڭ قوعامدا زاڭ مەن ءتارتىپتى ورنىقتىرۋ ۇدەرىسىندە اتقاراتىن ءرولى ايرىقشا ەكەنىن ايتتى, — دەپ حابارلايدى Tengrinews.kz ءتىلشىسى اقورداعا سىلتەمە جاساپ.

«ادىلەتتى قازاقستاندى كەمەڭگەر كوسەمدەر, اڭىزداعى قاھارماندار ەمەس, قاراپايىم ەڭبەككەرلەر مەن ادال ازاماتتار قۇرادى. وسىنداي ادامداردى جان-جاقتى ناسيحاتتاۋ قاجەت. زامانىمىزدىڭ ناعىز باتىرلارى جانە ۇلتىمىزدىڭ سەنىمدى تىرەگى – وسىنداي ادامدار. مەملەكەتتىڭ قۋاتى – حالىقتا, ال حالىقتىڭ قۋاتى جاسامپاز كۇش-جىگەردە جانە وتانشىلدىقتا.

سوندىقتان ەلىمىزدەگى بارلىق اۋقىمدى وزگەرىستەر ادامعا, ونىڭ قارىم-قابىلەتىن تولىق اشۋعا باعىتتالعان. ءبىز ءۇشىن رەفورمالاردىڭ ءوزى عانا ەمەس, تۇپكى ءمانى ماڭىزدى. ءبىزدىڭ رەفورمالارىمىز قىزىل سوزگە ەمەس, ناقتى ىسكە نەگىزدەلگەن.

باستى ماقسات – ازاماتتارىمىزدىڭ بولاشاققا دەگەن سەنىمىن نىعايتىپ, ءال-اۋقاتىن ارتتىرۋ. بۇقارالىق اقپارات قۇرالدارىنىڭ قوعامدا زاڭ مەن ءتارتىپتى ورنىقتىرۋ ۇدەرىسىندە اتقاراتىن ءرولى ايرىقشا. بۇل – ەلىمىزدە جۇرگىزىلىپ جاتقان جاڭعىرۋلارعا نەگىز بولاتىن قاعيداتتاردىڭ ءبىرى», — دەدى پرەزيدەنت.