Toqaev Aral teńizi týraly: Túrki elderi ǵalymdarynyń yqpaldastyǵyn jandandyratyn kez keldi

Foto: ashyq derekkóz

Memleket basshysy Qasym-Jomart Toqaev Túrki memleketteri uıymynyń beıresmı sammıtinde sóılegen sózinde Kaspıı jáne Aral teńizderindegi ekologııalyq máselelerdi sheshý úshin birlesken kúsh-jiger qajet ekenine nazar aýdardy, dep habarlaıdy Zakon.kz.

«Kaspıı teńiziniń logıstıkalyq áleýetin arttyrý mańyzdy dedik. Biraq ondaǵy ekologııa máselelerin de nazardan tys qaldyrmaý qajet. Mysaly, ózekti túıtkildiń biri – teńizdiń tartylýy. Onyń qorshaǵan ortasyn, florasy men faýnasyn qorǵaý da – asa mańyzdy mindet. Kaspııdi qutqarý úshin naqty sheshimderdi pysyqtaý kerek. Osy rette, túrki elderi ǵalymdarynyń yqpaldastyǵyn jandandyratyn kez keldi. Sonymen qatar Aral teńiziniń qurǵap, shólge aınalýy – alańdatarlyq másele. Ekologııalyq apatqa ushyraǵan aımaqty ońaltý kerek. Buǵan qosa, transshekaralyq ózenderdiń sý qoryn tıimdi paıdalaný qajet. Ol úshin sý únemdeý tehnologııalaryn keńinen qoldaný kerek», – dedi Qazaqstan Prezıdenti.

Memleket basshysy sózin qorytyndylaı kele, búgingi basqosýdyń mańyzdy máselelerdi jan-jaqty talqylaýǵa múmkindik bergenin atap ótip, osyndaı kezdesýler túrki áleminiń halyqaralyq deńgeıdegi bedelin arttyrýǵa jáne baýyrlastyq baılanystardy nyǵaıtýǵa zor úles qosatynyn aıtty.

Buǵan deıin Memleket basshysy Qazaqstannyń Túrki memleketteri uıymynyń qazirgi tóraǵasy retinde onyń qyzmeti barynsha tıimdi bolǵanyn qalaıtynyn aıtqan edi.