Toqaev Bala quqyqtary jónindegi ýákildi qabyldady

Memleket basshysy Bala quqyqtary jónindegi ýákil Dınara Zákıevany qabyldady, dep habarlaıdy Qandastar.kz aqparattyq portaly BAQ.kz saıtyn silteme jasap.

Qasym-Jomart Toqaevqa bala quqyqtaryn qorǵaý jáne jas urpaqtyń densaýlyǵyn saqtaý men nyǵaıtý baǵytynda atqarylǵan jumystar týraly málimet berildi.

Sońǵy eki jylda balalardyń quqyqtaryn qorǵaý jáne qaýipsizdigin qamtamasyz etý, zorlyq-zombylyqtyń, sýııdtiń jáne jasóspirimder arasyndaǵy qylmystyń aldyn alý maqsatynda birqatar shara qabyldanyp, baǵdarlamalar men zańdar ázirlendi. Atalǵan jumys aıasynda Bala quqyqtary jónindegi ýákildiń bastamasymen zańnamaǵa 120 túzetý engizildi.

Dınara Zákıeva bıyl 13 óńirdegi jáne 73 eldi mekendegi ahýalǵa monıtorıng júrgizilgenin, sonyń ishinde 272 mekemedegi balalarǵa jasyryn saýaldama jasalǵanyn, 173 otbasyda tárbıelenip jatqan jetkinshekterdiń jaǵdaıymen tanysqanyn aıtty. Tekseris qorytyndysy boıynsha bala quqyqtaryn qorǵaýǵa qatysty qabyldanǵan zań normalaryn buzǵan 171 derek anyqtalǵan.

Budan bólek, aımaqtardaǵy 112 otbasylyq qoldaý ortalyǵynyń tıimdi jumys istep jatqany belgili boldy. Olar turmystyq zorlyq-zombylyqtyń aldyn alý men balalar quqyǵyn qorǵaý maqsatynda ashylǵan bolatyn.

Oblys ákimdikteri janynan bala quqyqtaryn qorǵaý jónindegi basqarma qurý jumystary qolǵa alyndy. Sondaı-aq balalardy qorǵaýǵa jaýapty óńirlik organdardyń mindetteri men mártebesin aıqyndaıtyn zań jobasy daıyndalyp jatyr.

Buǵan deıin Memleket basshysy qabyldanǵan zańdardy iske asyrý jóninde mindet júktegen edi. Bala quqyqtary jónindegi ýákil Prezıdent tapsyrmasynyń oryndalý barysy týraly baıandady. Atap aıtqanda, erekshe qajettilikteri bar balalardy damytý men ońaltý ortalyqtaryn qurý jumystaryn jandandyrýǵa toqtaldy. Qazirgi kezde «Qazaqstan halqyna» qory seriktesterimen birge 49 ońaltý ortalyǵyn ashty. Bul mekemelerde erekshe qajettilikteri bar balalarǵa qyzmet kórsetiledi.

Sonymen qatar kezdesýde «Qazaqstan balalary» baǵdarlamasyn ázirleý, onlaın qaýipsizdikti qamtamasyz etý jáne kámeletke tolmaǵan azamattardyń jeke málimetterin qorǵaý máseleleri talqylandy.

Prezıdent bala quqyqtaryn qorǵaýǵa kepildik berý júıesin nyǵaıtyp, jetkinshekterdi jan-jaqty qoldaý tetigin qalyptastyrý úshin jergilikti atqarýshy organdar men óńirlik ýákilderdiń kúsh-jigerin jumyldyrý mańyzdy ekenine nazar aýdardy. Budan bólek, mektepterdegi ınklıýzıvti bilim berý isin damytýdy kózdeıtin qosymsha sharalar qabyldaýdy tapsyrdy.