جاڭالىقتار
توقاەۆ يتاليانىڭ پرەزيدەنتىن كۇتىپ الدى
فوتو: اقوردا
يتاليا پرەزيدەنتىنىڭ ۇشاعى ەلوردا اۋەجايىنا قوندى, دەپ حابارلايدى qandastar.kz
قاسىم-جومارت توقاەۆ سەردجو ماتتارەللانى قارسى الدى. ودان كەيىن مەملەكەتتەر باسشىلارى كەلىسسوز زالىنا باردى.
«پرەزيدەنتتەر بۇعان دەيىن 2024 جىلى قاڭتار ايىندا ريم قالاسىندا كەزدەسكەن بولاتىن», — دەلىنگەن اقوردانىڭ تاراتقان حابارلاماسىندا.
– يتالياعا بىلتىرعى ساپارىمنان جاقسى اسەر الدىم. ءسىزدىڭ قوناقجايلىق تانىتىپ, ناتيجەلى كەلىسسوز جۇرگىزۋگە بارىنشا جاعداي جاساعانىڭىزدىڭ ارقاسىندا ساپارىم وتە ءساتتى ءوتتى. ەكى مەملەكەت ءتۇرلى سالادا تىعىز قارىم-قاتىناس ورناتقان. ءبىزدىڭ نارىقتا ءبىراز يتاليالىق كومپانيا جۇمىس ىستەيدى. ولاردىڭ قاتارى قارقىندى ارتىپ كەلەدى. مادەني-گۋمانيتارلىق بايلانىستارىمىز دا ويداعىداي دامىپ جاتىر. سوندىقتان ەلدەرىمىزدىڭ اراسىندا بەرىك ىنتىماقتاستىق قالىپتاسقان دەپ سانايمىن, – دەدى قاسىم-جومارت توقاەۆ.
سەردجو ماتتارەللا ەكىجاقتى قاتىناستاردىڭ قازىرگى جاعدايىن جوعارى باعالاپ, ءوزارا ستراتەگيالىق سەرىكتەستىكتى كەڭەيتۋگە مول مۇمكىندىك بار ەكەنىن اتاپ ءوتتى.
– ءبىز شىن مانىندە بارلىق باعىتتا, سونىڭ ىشىندە ساياسي, ەكونوميكالىق, ساۋدا جانە مادەني سالالاردا تاماشا بايلانىس ورناتتىق, – دەدى يتاليا پرەزيدەنتى.
مەملەكەت باسشىسىنىڭ ايتۋىنشا, يتاليا قازاقستاننىڭ باستى ساۋدا سەرىكتەستەرىنىڭ اراسىندا ءۇشىنشى ورىن الادى, سونداي-اق ەكونوميكامىزعا قارجى قۇيعان بەس ءىرى ينۆەستوردىڭ قاتارىنا كىرەدى. وتكەن جىلدىڭ قورىتىندىسى بويىنشا ءوزارا ساۋدا اينالىمى 20 ميلليارد دوللارعا جۋىقتاعان.
