Jańalyqtar
Toqaev Italııanyń prezıdentin kútip aldy
Foto: Aqorda
Italııa Prezıdentiniń ushaǵy elorda áýejaıyna qondy, dep habarlaıdy qandastar.kz
Qasym-Jomart Toqaev Serdjo Mattarellany qarsy aldy. Odan keıin memleketter basshylary kelissóz zalyna bardy.
«Prezıdentter buǵan deıin 2024 jyly qańtar aıynda Rım qalasynda kezdesken bolatyn», — delingen Aqordanyń taratqan habarlamasynda.
– Italııaǵa byltyrǵy saparymnan jaqsy áser aldym. Sizdiń qonaqjaılyq tanytyp, nátıjeli kelissóz júrgizýge barynsha jaǵdaı jasaǵanyńyzdyń arqasynda saparym óte sátti ótti. Eki memleket túrli salada tyǵyz qarym-qatynas ornatqan. Bizdiń naryqta biraz ıtalııalyq kompanııa jumys isteıdi. Olardyń qatary qarqyndy artyp keledi. Mádenı-gýmanıtarlyq baılanystarymyz da oıdaǵydaı damyp jatyr. Sondyqtan elderimizdiń arasynda berik yntymaqtastyq qalyptasqan dep sanaımyn, – dedi Qasym-Jomart Toqaev.
Serdjo Mattarella ekijaqty qatynastardyń qazirgi jaǵdaıyn joǵary baǵalap, ózara strategııalyq seriktestikti keńeıtýge mol múmkindik bar ekenin atap ótti.
– Biz shyn máninde barlyq baǵytta, sonyń ishinde saıası, ekonomıkalyq, saýda jáne mádenı salalarda tamasha baılanys ornattyq, – dedi Italııa Prezıdenti.
Memleket basshysynyń aıtýynsha, Italııa Qazaqstannyń basty saýda seriktesteriniń arasynda úshinshi oryn alady, sondaı-aq ekonomıkamyzǵa qarjy quıǵan bes iri ınvestordyń qataryna kiredi. О́tken jyldyń qorytyndysy boıynsha ózara saýda aınalymy 20 mıllıard dollarǵa jýyqtaǵan.
