جاڭالىقتار
توقاەۆ «قازاقستان تەمىر جولى» كومپانياسىنىڭ توراعاسىن قابىلدادى
فوتو: اقوردا
مەملەكەت باسشىسىنا ۇلتتىق كومپانيانىڭ بىلتىر اتقارعان جۇمىسى تۋرالى ەسەپ بەرىلدى, دەپ جازدى qandastar.kz
نۇرلان ساۋرانباەۆ نەگىزگى وندىرىستىك كورسەتكىشتەردە ءوسىمنىڭ وڭ قارقىنى ساقتالىپ وتىرعانىن ايتتى:
ەكسپلۋاتاتسيالىق جۇك اينالىمى 272 ميلليارد توننا-شاقىرىمدى قۇراعان. قازاقستان-قىتاي تۇيىسپەلەرى ارقىلى 32 ميلليون توننا جۇك تاسىمالداندى. بۇل – رەكوردتىق كورسەتكىش, ءارى 2023 جىلمەن سالىستىرعاندا 13,1 پايىزعا ارتىق; كونتەينەرلىك ترانزيت 8,8 پايىزعا ءوستى. تاسىمالدانعان كونتەينەرلەر سانى 1,4 ميلليون جيىرما پۇتتىق ەكۆيۆالەنتتى قۇرادى.سونداي-اق ءىرى ينفراقۇرىلىمدىق جوبالاردىڭ ىسكە اسىرىلۋ بارىسى جانە ترانزيت الەۋەتىن دامىتۋ جونىندە بەرگەن پرەزيدەنت تاپسىرمالارىنىڭ ورىندالۋى جايىندا باياندالدى:
– 2800 شاقىرىمنان استام تەمىر جولعا جوندەۋ جۇمىستارى جۇرگىزىلگەن. دوستىق – مويىنتى, داربازا – ماقتاارال باعىتتارىندا جانە الماتى تورابىنىڭ اينالما جولىندا 1000 شاقىرىمنان استام جاڭا جەلى سالىنىپ جاتىر. دوستىق – مويىنتى ۋچاسكەسى جانە جەتىگەن – قازىبەك-بەك اينالما جەلىسىنىڭ ەكىنشى جولدارىن سالۋ جۇمىستارى كەستەدەگى مەرزىمىنەن بۇرىن, ياعني بيىل اياقتالادى.
كومپانيا توراعاسى قازاقستاندىق دالىزدەرگە جۇك اعىندارىن تارتۋ ءۇشىن تەرمينال جەلىسىنىڭ كەڭەيىپ جاتقانى تۋرالى مالىمەت بەردى.
– سيان قالاسىنىڭ قۇرعاق پورتىندا قازاقستان-قىتاي تەرمينالى ىسكە قوسىلدى. بۇل ترانسكاسپي باعىتى ارقىلى قىتايدان كەلەتىن تاسىمالدىڭ ۇلعايۋىنا ىقپال ەتتى. الماتى قالاسىندا, ازەربايجاننىڭ اليات تەڭىز پورتىندا, ماجارستان استاناسى بۋداپەشت قالاسىندا, ماسكەۋ ماڭىنداعى سەلياتينو كەنتىندە شىعىس – باتىس باعىتى بويىنشا تەرمينالداردىڭ قۇرىلىسى باستالدى. قىتايلىق سەرىكتەس ليانيۋنگان پورتىمەن بىرلەسىپ, اقتاۋ پورتىندا كونتەينەرلىك حاب سالۋ جۇمىستارى قولعا الىندى.
سونىمەن قاتار ول مەملەكەت باسشىسى قولداۋ بىلدىرگەن بىرقاتار جاڭا جوبالاردى تانىستىرىپ, كومپانيا ينفراقۇرىلىمدى, تەرمينال جەلىسىن دامىتۋعا جانە تسيفرلىق شەشىمدەردى ەنگىزۋگە باسا نازار اۋداراتىنىن جەتكىزدى.
قاسىم-جومارت توقاەۆ وسى باعىتتارداعى جۇمىستى جانداندىرۋدىڭ ماڭىزىن اتاپ ءوتتى. مەملەكەت باسشىسىنىڭ ايتۋىنشا, العا قويعان مىندەتتەردى جوسپارلى ىسكە اسىرۋ قازاقستاننىڭ ەۋرازياداعى ترانزيتتىك حاب رەتىندەگى الەۋەتىن نىعايتۋدا ايتارلىقتاي ناتيجەگە قول جەتكىزۋگە مۇمكىندىك بەرەدى.
