جاڭالىقتار
توقاەۆ كيەۆتە جۋرناليست سادىقوۆقا جاسالعان شابۋىلعا قاتىستى پىكىر ءبىلدىردى
قاسىم-جومارت توقاەۆ كيەۆتە قازاقستان جۋرناليسىنە جاسالعان قاستاندىق ارەكەتكە قاتىستى پىكىر ءبىلدىردى,-دەپ حابارلايدى Qandastar.kz
«ەلىمىزدە زاڭ ۇستەمدىگىن نىعايتىپ جاتىرمىز, ياعني بارلىق سالادا, ەڭ الدىمەن, زاڭ ۇستەمدىگىن قامتاماسىز ەتۋ – باستى مىندەت. بۇل ماسەلە بويىنشا مەنىڭ كوزقاراسىم – ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس. سوندىقتان قوعامداعى بارلىق قاراما-قايشىلىقتار مەن كەلىسپەۋشىلىكتەردى تەك قانا قۇقىقتىق تۇرعىدان, ياعني ءتيىستى زاڭناماعا جانە نەگىزگى حالىقارالىق نورمالارعا سايكەس شەشۋ قاجەت. كەشە قازاقستان ازاماتى ايدوس سادىقوۆقا قاتىستى كيەۆتە بولعان قىلمىسقا دا ءدال وسى ۇستانىم تۇرعىسىنان قاراعان ءجون.
مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا رەسمي سۇراتۋلار جىبەرۋ تۋرالى ناقتى تاپسىرما بەردىم. سونداي-اق قاجەت بولعان جاعدايدا قازاقستاننىڭ رەسمي ورگاندارى ءىستىڭ اقيقاتىنا جەتۋگە جاردەم بەرۋ ءۇشىن تەرگەۋ جۇمىسىنا قاتىسۋعا دايىن ەكەنىن ايتقىم كەلەدى», – دەدى پرەزيدەنت.
18 ماۋسىمدا باق كيەۆتە ايدوس سادىقوۆقا قاستاندىق جاسالعانىن حابارلادى. ۋكراينا ۇلتتىق پوليتسياسىنىڭ مالىمەتىنشە, بەلگىسىز بىرەۋ يارمولا كوشەسىندە تۇراقتا تۇرعان كولىككە جاقىنداپ, ىشىندە وتىرعان ەر ادامعا وق اتقان, سودان كەيىن قاشىپ كەتكەن. جابىرلەنۋشىنىڭ قاسىندا وتىرعان ايەل زارداپ شەككەن جوق.
زارداپ شەگۋشى مەديتسينالىق مەكەمەگە جاتقىزىلدى. كيەۆ پوليتسياسى ادام ولتىرۋگە وقتالۋ دەرەگى بويىنشا قىلمىستىق ءىس قوزعاعان.
