توقاەۆ قوستاناي ءوڭىرىنىڭ اۋىل شارۋاشىلىعى الەۋەتىمەن تانىستى

فوتو: اقوردا

پرەزيدەنت قوستاناي ءوڭىرىنىڭ اۋىل شارۋاشىلىعى الەۋەتىمەن تانىستى, دەپ حابارلايدى qandastar.kz اقورداعا سىلتەمە جاساپ. 

مەملەكەت باسشىسى قوستاناي اۋدانىنىڭ مايكول اۋىلدىق وكرۋگىندەگى «نادەجدينكا» جاۋاپكەرشىلىگى شەكتەۋلى سەرىكتەستىگىندە اۋىل شارۋاشىلىعى تاۋارلارىن وندىرۋشىلەرمەن كەزدەستى.

قاسىم-جومارت توقاەۆقا وبلىس اكىمى وڭىردەگى اۋىل شارۋاشىلىعىن دامىتۋ شارالارى جونىندە مالىمەت بەردى.

قۇمار اقساقالوۆتىڭ بايانداۋىنشا, بيىل ديقاندار 5 ميلليون گەكتار القاپقا ەگىن ەككەن. ەليتالىق تۇقىمنىڭ ۇلەسى مەن مينەرالدى تىڭايتقىشتاردى سەبۋ كولەمىن ۇلعايتۋ, سونداي-اق ماشينا-تراكتور پاركىن جاڭارتۋ ارقىلى ەگىن شارۋاشىلىعىنىڭ ونىمدىلىگىن ارتتىرۋ جوسپارلانىپ وتىر.

سونداي-اق مەملەكەت باسشىسىنا وڭىردە مال جانە قۇس شارۋاشىلىعى سالالارىن دامىتۋ تۋرالى باياندالدى. اتاپ ايتقاندا, الداعى ءۇش جىلدا 14 تاۋارلى ءسۇت فەرماسىنا ينۆەستيتسيا تارتىلادى. مال شارۋاشىلىعىنا ارنالعان 44 كەشەن جانە ەكى ءىرى قۇس فابريكاسى سالىنادى. اتالعان جوبالار ەسەبىنەن وبلىستاعى ءسۇت جانە ەت ءوندىرۋ كولەمى 1,4 ەسە, ال قۇس ەتى ءوندىرىسى 5 ەسە كوبەيەدى. بۇدان بولەك, بىرقاتار ينۆەستيتسيالىق جوبانى جۇزەگە اسىرۋ ناتيجەسىندە ءۇش جىل ىشىندە تەرەڭ وڭدەلەتىن ونىمدەردىڭ ۇلەسىن 70 پايىزعا دەيىن جەتكىزۋ مىندەتى قويىلعان.

پرەزيدەنت «نادەجدينكا» جشس-ءنىڭ ەگىس القابىن ارالاپ كورىپ, اۋىل شارۋاشىلىعى ەڭبەككەرلەرىمەن اڭگىمەلەستى. مەملەكەت باسشىسى ەگىندى ۋاقتىلى جيناپ الۋ, ەڭبەك ونىمدىلىگىن ارتتىرۋ جانە اگرارلىق سالاعا جاڭا تەحنولوگيالار ەنگىزۋ, اۋىل شارۋاشىلىعى جەرلەرىن ماقساتقا ساي پايدالانۋ ماڭىزدى ەكەنىن اتاپ ءوتتى. قاسىم-جومارت توقاەۆ مەملەكەت وتاندىق فەرمەرلەردى قولداۋدى جالعاستىراتىنىن جانە تابىستى جوبالاردى جۇزەگە اسىرۋعا كومەك كورسەتەتىنىن جەتكىزدى.