جاڭالىقتار
توقاەۆ مەملەكەتكە وپاسىزدىق جاساۋ بابىمەن سوتتالعان عالىمعا كەشىرىم بەردى
فوتو: ۆيدەودان الىندى
ساياساتتانۋشى اندرەي چەبوتارەۆ قازاقستان پرەزيدەنتى ءتيىستى جارلىقپەن قىتايتانۋشى عالىم كونستانتين سىروەجكينگە راقىمشىلىق جاساعانىن ايتتى, – دەپ حابارلايدى qandastar.kz Aikyn.kz.
اقپارات ساياساتتانۋشىنىڭ Telegram-داعى ارناسىندا جاريالاندى.
«وتكەن جازدان بەرى جاقسى جاڭالىق! قازاقستان رەسپۋبليكاسى پرەزيدەنتىنىڭ جانىنداعى راقىمشىلىق ماسەلەلەرى جونىندەگى كوميسسيانىڭ ۇسىنىسى بويىنشا, مەملەكەت باسشىسى قاسىم-جومارت توقاەۆ ءتيىستى جارلىقپەن بەلگىلى قىتايتانۋشى عالىم, ساياساتتانۋ عىلىمدارىنىڭ دوكتورى جانە پروفەسسور كونستانتين سىروەجكينگە راقىمشىلىق جاسادى. وسىعان بايلانىستى ونىڭ سوتتىلىعى الىنىپ تاستالدى جانە ول ءوز قۇقىعىن قالپىنا كەلتىردى. جالپى, ادىلەتتىلىك ورنادى! ارىپتەسىمىزگە جانە تالىمگەرىمىزگە زور دەنساۋلىق جانە جاڭا عىلىمي جەتىستىكتەر تىلەيمىن», – دەپ جازدى اندرەي چەبوتارەۆ.
ايتا كەتەيىك, 2019 جىلدىڭ اقپانىندا ونى ۇقك قىزمەتكەرلەرى مەملەكەتكە وپاسىزدىق جاسادى دەگەن كۇدىكپەن ۇستادى. ساياساتتانۋشى ساتقىندىق جاسادى دەگەن ايىپپەن كىنالى دەپ تانىلىپ, 10 جىلعا باس بوستاندىعىنان ايىرۋ جازاسىن الدى. كەيىن مەملەكەتكە وپاسىزدىق جاساعانى ءۇشىن سوتتالعان ساياساتتانۋشى سىروەجكين قازاقستان ازاماتتىعىنان ايىرىلدى, الايدا سول جىلدىڭ قاراشا ايىندا ۇكىم وزگەرتىلدى. سوت القاسى قوسىمشا جازالاردىڭ كۇشىن جويۋ تۋرالى شەشىم قابىلدادى. بۇرىن ايتىلعان ۇكىمگە سايكەس, ونى ازاماتتىعىنان ايىرۋعا, سونداي-اق قازاقستاننان ماجبۇرلەپ شىعارۋعا تۋرا كەلەر ەدى. بۇل رەتتە ساياساتتانۋشىعا وتانىنا ورالۋعا تىيىم سالىنۋى دا مۇمكىن بولاتىن.
سوت القاسى بۇل تارماقتاردىڭ كۇشىن جويدى.
وسى جىلدىڭ ءساۋىر ايىندا مەملەكەتكە وپاسىزدىق جاسادى دەپ 10 جىلعا سوتتالعان كونستانتين سىروەجكين بوستاندىققا شىقتى. الماتى وبلىستىق سوتىندا سوتتالعان كونستانتين سىروەجكيننىڭ ءبىرىنشى ساتىداعى سوتتىڭ مەرزىمىنەن بۇرىن شارتتى تۇردە بوساتۋ تۋرالى ءوتىنىشتى قاناعاتتاندىرۋدان باس تارتۋ تۋرالى جەكە شاعىمى قاناعاتتاندىرىلدى.
