توقاەۆ: مۇنداي باستاما ۇلتتىق اسكەرىمىزدىڭ بەدەلىن ارتتىرا تۇسەدى

مەملەكەت باسشىسى ۇلتتىق ۇلان اۆيابازاسىنىڭ اشىلۋ راسىمىنە قاتىستى. بۇل تۋرالى اقوردانىڭ ءباسپاسوز قىزمەتى حابارلادى. پرەزيدەنت – قر قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆتىڭ قاتىسۋىمەن استانا قالاسىندا ۇلتتىق ۇلاننىڭ اۆياتسيا بازاسىنىڭ اشىلۋ ءراسىمى ءوتتى.

مەملەكەت باسشىسى, ەڭ الدىمەن, جيىنعا قاتىسۋشىلاردى الداعى وتان قورعاۋشىلار كۇنىمەن قۇتتىقتاپ, بۇل وتانشىلدىق سەزىمدى وياتىپ, جاۋىنگەرلىك رۋحتى ارتتىراتىن مارتەبەلى مەرەكە ەكەنىن ايتتى. سونىمەن قاتار قارۋلى كۇشتەردى ەگەمەن ەلىمىزدىڭ مىقتى قالقانى, بەيبىتشىلىك پەن تۇراقتىلىقتىڭ مىزعىماس تىرەگى رەتىندە اتاپ ءوتتى. – اۆياتسيالىق بازانىڭ اشىلۋى – ۇلتتىق ۇلان عانا ەمەس, بۇكىل اسكەرىمىز ءۇشىن ايتۋلى وقيعا. بۇل بازا كۇشتىك قۇرىلىمداردىڭ الەۋەتىن ەداۋىر ارتتىرۋعا مۇمكىندىك بەرەدى.

ۇشقىشتاردىڭ شۇعىل ارەكەت ەتۋىنە جاعداي جاسايدى. مەملەكەت قارۋلى كۇشتەردى جابدىقتاپ, اسكەري ينفراقۇرىلىمدى دامىتۋ ماسەلەسىن ايرىقشا نازاردا ۇستايدى, – دەدى قاسىم-جومارت توقاەۆ. پرەزيدەنت ەلىمىزدىڭ بىرقاتار وڭىرىندە بولعان الاپات تاسقىنعا قارسى كۇرەستە ساربازداردىڭ الدىڭعى شەپتەن تابىلىپ, انتقا ادال بولۋدىڭ وزىق ۇلگىسىن كورسەتكەنىنە توقتالدى. – وسى ورايدا مەن اسكەري ۇشقىشتاردىڭ كاسىبي تۇرعىدان بىلىكتى جانە شەبەر ارەكەتىن ەرەكشە اتاپ وتكىم كەلەدى. ولار زارداپ شەككەن ايماقتارعا گۋمانيتارلىق جۇك جەتكىزدى.

ازاماتتاردى قاۋىپسىز جەرگە كوشىردى. سونىڭ ءبارىن ءمىنسىز اتقاردى. وسىنداي قيىن-قىستاۋ كەزدە حالىقپەن بىرگە بولعان ساربازدارعا زور ريزاشىلىعىمدى بىلدىرەمىن, – دەدى قاسىم-جومارت توقاەۆ. مەملەكەت باسشىسى اسكەرىمىزدىڭ ساپىندا ءوز ءىسىنىڭ ناعىز كاسىبي ماماندارى قىزمەت ەتەتىنىن جەتكىزدى پرەزيدەنتتىڭ ايتۋىنشا, قازاقستاننىڭ اسكەري قىزمەتشىلەرى بۇۇ اياسىنداعى ءتۇرلى حالىقارالىق ميسسيالارعا قاتىسىپ, بىتىمگەرلىك بورىشتارىن تابىستى اتقارىپ كەلەدى.

بيىل ولار ءوز مىندەتتەرىن گولان جوتالارىندا العاش رەت دەربەس ورىنداۋعا كىرىستى. بۇل اسكەرىمىزدىڭ دايىندىق دەڭگەيىنىڭ جوعارى ەكەنىن جانە ەلىمىزدىڭ الەمدىك ارەناداعى بەدەلىنىڭ ءوسىپ كەلە جاتقانىن انىق كورسەتەدى. – حالقىمىز ەرجۇرەك جاۋىنگەرلەرىن قادىر تۇتقان, ولارعا قۇرمەت كورسەتكەن. مەن ۇلتتىق قۇرىلتايدىڭ اتىراۋداعى وتىرىسىندا تالدىقورعان قالاسىنداعى اسكەري اۆيابازاعا جەرلەسىمىز, كەڭەس وداعىنىڭ ەكى مارتە باتىرى سەرگەي لۋگانسكيدىڭ اتىن بەرۋ تۋرالى تاپسىرما بەردىم. الماتىلىق داڭقتى ۇشقىشتىڭ ونەگەلى ءومىرى ۇرپاققا ءاردايىم ۇلگى بولۋى كەرەك. مۇنداي باستاما ۇلتتىق اسكەرىمىزدىڭ بەدەلىن ارتتىرا تۇسەتىنى ءسوزسىز. ەل ءۇشىن جاسالعان ەرلىك ەشقاشان ۇمىتىلمايدى, – دەدى مەملەكەت باسشىسى. پرەزيدەنت اسكەري قىزمەتشىلەردىڭ ەرجۇرەك باتىرلار مەن داڭقتى بابالاردىڭ جولىن ابىرويمەن جالعاستىرىپ كەلە جاتقانىن ايتىپ, ولاردىڭ وتان الدىنداعى قىزمەتتەرىنە تابىس تىلەدى.

مەملەكەت باسشىسىنا قارۋلى كۇشتەردىڭ, باسقا دا اسكەري قۇرامالاردىڭ ۇشاقتارى مەن تىكۇشاقتارىنىڭ, جاۋىنگەرلىك جانە ارناۋلى تەحنيكالارىنىڭ جاڭا ۇلگىلەرى تانىستىرىلدى قاسىم-جومارت توقاەۆ اۆيابازاداعى بىرقاتار ينفراقۇرىلىمدىق نىساندى ارالاپ كوردى. ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى ەركىن بوتاقانوۆ جاۋىنگەرلىك تاپسىرمالاردى ءوز دەڭگەيىندە ورىنداۋ ءۇشىن بازادا بارلىق جاعداي جاسالعانىن مالىمدەدى. پرەزيدەنت اسكەري قالاشىقتىڭ داڭق زالىنا بارىپ, قۇرمەتتى قوناقتار كىتابىنا قولتاڭبا قالدىردى. اۆيابازانىڭ استانا اۋە ايلاعىندا ورنالاسۋى جەكە قۇرام مەن تەحنيكانى قاجەت جەرىنە ۋاقىتىلى جەتكىزۋگە مۇمكىندىك بەرەدى. سونداي-اق اۋەدەن بارلاۋ جۇرگىزۋ, زارداپ شەككەندەردى ەۆاكۋاتسيالاۋ كەزىندە ۇلتتىق ۇلاننىڭ بولىمشەلەرىنە اۆياتسيالىق قولداۋ كورسەتەدى.