Toqaev pen Mırzııoev Almatyda kezdesti

Qasym-Jomart Toqaev pen Shavkat Mırzııoev Almaty taý shańǵysy klasterimen tanysty, dep habarlaıdy qandastar.kz

Qala ákimi Erbolat Dosaev prezıdentterge Ile Alataýynyń asqaraly shyńdaryn kórsetip, Kishi Almaty shatqalyndaǵy «Medeý» selden qorǵaý bógetin salý tarıhy jóninde aıtty. Sonymen qatar sheteldik jáne jergilikti alpınıster men týrıster arasynda tanymal baǵyttar tanystyryldy.

Qasym-Jomart Toqaev pen Shavkat Mırzııoev qala ákiminiń elimizdegi eń iri «Shymbulaq» taý shańǵysy kýrorty jónindegi esebin tyńdady. Qazirgi kezde munda 5 aspaly jol jumys istep tur. Al shańǵy tebýge arnalǵan trassanyń jalpy uzyndyǵy 25 shaqyrymdy quraıdy. Byltyr Shymbulaqqa 1,4 mıllıon adam kelgen.

Memleketter basshylary Almatynyń týrıstik áleýetine joǵary baǵa berdi. Olardyń pikirinshe, ásem tabıǵat aıasynda ornalasqan jáne damyǵan ınfraqurylymy, sapaly joly bar taý shańǵysy kýrorty – Ortalyq Azııadaǵy qysqy jáne jazǵy demalysqa laıyq eń tartymdy oryndardyń biri.

Prezıdentterge Almaty taý klasterin odan ári damytý perspektıvasy týraly málimet berildi. Atap aıtqanda, «Shymbulaqtyń» qazirgi taý shańǵysy trassasyn 56 shaqyrymǵa deıin uzartý jáne jańadan 65 shaqyrym ınfraqurylym salý josparlanyp otyr.