جاڭالىقتار
توقاەۆ سەربيا پرەزيدەنتىمەن شاعىن قۇرامدا كەلىسسوز جۇرگىزدى
فوتو: اقوردا
قاسىم-جومارت توقاەۆ قوناقجايلىق تانىتقانى ءۇشىن الەكساندر ۆۋچيچكە ريزاشىلىعىن ءبىلدىرىپ, قازاقستان پرەزيدەنتى رەتىندەگى سەربياعا العاشقى ساپارىنىڭ ءمانى ەرەكشە ەكەنىن ايتتى. سونىمەن قاتار بۇل ساپار قازاق-سەرب قارىم-قاتىناسىنىڭ جاڭا كەزەڭىنە جول اشاتىنىن اتاپ ءوتتى, دەپ جازادى qandastar.kz
مەملەكەت باسشىسى ەكى ەل اراسىنداعى ءوزارا ءتيىمدى ىنتىماقتاستىق حالىقتار دوستىعىنا, ساياسي ديالوگ پەن ءوزارا قولداۋعا ۇدايى ارقا سۇيەيتىنىن جەتكىزدى. قاسىم-جومارت توقاەۆتىڭ ايتۋىنشا, سوڭعى جىلدارى استانا مەن بەلگراد ەكونوميكالىق ىقپالداستىقتى نىعايتۋ ءۇشىن ناقتى شارالار قابىلداپ, ساۋدا جانە ينۆەستيتسيالىق بايلانىستاردى بەلسەندى دامىتىپ كەلە جاتىر.
ورايلى ءساتتى پايدالانا وتىرىپ, قاسىم-جومارت توقاەۆ كوكتەمگى سۋ تاسقىنى كەزىندە كومەك كورسەتكەنى ءۇشىن الەكساندر ۆۋچيچ پەن سەربيا حالقىنا العىس ايتتى. مەملەكەت باسشىسى مۇنى ەكى ەل اراسىنداعى شىنايى دوستىقتىڭ جارقىن كورىنىسى رەتىندە باعالادى.
الەكساندر ۆۋچيچ ەكى ەلدىڭ ىنتىماقتاستىعى ءوزارا قۇرمەت پەن سەنىم نەگىزىندە دامىپ كەلە جاتقانىن اتاپ ءوتتى. سەربيا پرەزيدەنتىنىڭ ايتۋىنشا, بەلگراد قازاقستانمەن ەكونوميكالىق بايلانىستاردى, سونىڭ ىشىندە ساۋدا, ينۆەستيتسيا سەكىلدى باستى باعىتتار بويىنشا بىرلەسكەن جوبالاردى جۇزەگە اسىرۋ ارقىلى ىقپالداستىقتى ودان ءارى تەرەڭدەتۋگە نيەتتى.
الەكساندر ۆۋچيچ سەربيانىڭ ەلىمىزبەن ساياسي ديالوگتى نىعايتۋعا بەيىل ەكەنىن راستاپ, حالىقارالىق ارەناداعى ءىس-قيمىلدى ۇيلەستىرۋدىڭ ماڭىزىنا توقتالدى.
كەزدەسۋدە مەملەكەتتەر باسشىلارى قازاقستان مەن سەربيا اراسىنداعى قارىم-قاتىناستى ودان ءارى نىعايتۋدىڭ پەرسپەكتيۆاسىن, ەكىجاقتى ىنتىماقتاستىقتىڭ جاڭا باعىتتارىن تالقىلادى. بۇدان بولەك تاراپتار ايماقتىق جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
