توقاەۆ «جىلۋ ەنەرگەتيكاسى تۋرالى» زاڭعا قول قويدى

قۇجات العاش رەت جىلۋمەن جابدىقتاۋ جۇيەلەرىنىڭ ساپالى جۇمىس ىستەۋى مەن دامۋى ءۇشىن جىلۋ ەنەرگياسىن ءوندىرۋ, بەرۋ, وتكىزۋ جانە تۇتىنۋ پروتسەسىندە تۋىندايتىن قوعامدىق قاتىناستاردى دەربەس زاڭ تۇرىندە رەتتەيدى.

سونىمەن قاتار جىلۋ ەنەرگەتيكاسى سالاسىنىڭ ساپالى جانە ۇزدىكسىز جۇمىس ىستەۋىن قامتاماسىز ەتۋ ءۇشىن جاڭا تەتىكتەردى ەنگىزۋ جانە قولدانىستاعىسىن كۇشەيتۋ جولىمەن رەتتەۋ جۇيەسى جاڭعىرتىلدى.

جىلۋ ەنەرگەتيكاسى سالاسىنداعى مەملەكەتتىك رەتتەۋدىڭ ماقساتتارى, مىندەتتەرى, قاعيداتتارى ايقىندالدى.

بۇدان بولەك, اتالعان سەكتوردىڭ دايەكتى جانە ءتيىمدى دامۋىن قامتاماسىز ەتۋ ءۇشىن ونى ىلگەرىلەتۋدىڭ جوسپارلاۋ جانە جاي-كۇيىن باعالاۋ تەتىكتەرى ەنگىزىلدى. اتاپ ايتقاندا, ەنەرگەتيكا مينيسترلىگى جىلۋ ەنەرگەتيكاسىنىڭ وڭىرلەر, سونداي-اق, ءوندىرىس, تاسىمالداۋ, وتكىزۋ, تۇتىنۋ سەكتورلارى بويىنشا سالالىق مەملەكەتتىك ورگاندار ازىرلەگەن نەگىزگى جانە ماقساتتى كورسەتكىشتەردى بەكىتەدى.

جىلۋمەن جابدىقتاۋ جۇيەسى قۇرىلىمدالىپ, جىلۋمەن جابدىقتايتىن سۋبەكتىلەر مەن ولاردىڭ قىزمەتتەرىن تۇتىنۋشىلاردىڭ قۇقىقتارى مەن مىندەتتەرى رەتتەلگەن.

جىلۋمەن جابدىقتاۋ جۇيەلەرى قۋاتتىلىعىنا جانە تۇتىنۋشىلاردىڭ قوسىمشا جۇكتەمەسىنە قاراي ورتالىقتاندىرىلعان, جەرگىلىكتى جانە جەكە جىلۋمەن جابدىقتاۋ جۇيەلەرى بولىپ بولىنەدى.

سەكتوردىڭ ينۆەستيتسيالىق تارتىمدىلىعىن ارتتىرۋ ءۇشىن تاريفتىك رەتتەۋ, ەنەرگيا ۇنەمدەۋدى قولداۋ, جىلۋ ەنەرگەتيكاسىندا جاڭارتىلاتىن ەنەرگيا كوزدەرىن پايدالانۋ تەتىكتەرى جاڭارتىلدى.

جىلۋمەن جابدىقتاۋدىڭ سەنىمدىلىگى مەن قاۋىپسىزدىگىن قامتاماسىز ەتۋ تالاپتارى, جوندەۋ جۇمىستارىن جۇرگىزۋ جانە جىلۋ ەنەرگياسى كوزدەرىن پايدالانۋدان شىعارۋ شارتتارى بەلگىلەندى. سونىمەن قاتار جىلىتۋ ماۋسىمىنا دايىندىقتى قامتاماسىز ەتۋ تالاپتارى كۇشەيتىلدى.

زاڭنىڭ ءماتىنى باسپاسوزدە جاريالانادى.