جاڭالىقتار
«تولقىنداردىڭ بيىكتىگى 4 مەترگە جەتتى»: كامچاتكادا ماگنيتۋداسى 8,7 باللدىق جەر سىلكىنىسىنەن كەيىن تسۋنامي بولدى
فوتو: ۆيدەودان سكرين
تىنىق مۇحيتىندا جانە كامچاتكا ماڭىندا ماسكەۋ ۋاقىتىمەن 2:30-دا ماگنيتۋداسى شامامەن 8,7 بولاتىن جەر سىلكىنىسى تىركەلدى, دەپ جازادى qandastar.kz
بۇل تۋرالى Stan.kz اقپارات اگەنتتىگى Gazeta.ru باسىلىمىنا سىلتەمە جاساپ حابارلايدى.
جەر سىلكىنىسىنىڭ ەپيتسەنترى پەتروپاۆل-كامچاتسكي قالاسىنان 161 شاقىرىم شىعىستا, 32 شاقىرىم تەرەڭدىكتە ورانالاسقان.
بۇل — 1952 جىلدان بەرگى ايماقتاعى ەڭ كۇشتى جەر سىلكىنىسى. تسۋنامي قاۋپى جاريالانىپ, بيىكتىگى 4 مەترگە دەيىن جەتكەن تولقىندار تىركەلدى. رەسەي جانە كورشىلەس جاپونيا بيلىگى تۇرعىنداردى جاعالاۋعا جاقىنداماۋعا شاقىردى. بىرنەشە ادام زارداپ شەككەن, ازىرگە قازا تاپقاندار تۋرالى اقپارات جوق.
رەسەي توتەنشە جاعدايلار مينيسترىلىگىنىڭ قۇتقارۋشىلارى مەن ءورت سوندىرۋشىلەرى جويقىن جەر سىلكىنىسىنەن كەيىن عيماراتتاردى تەكسەرىپ جاتىر.
“كامچاتكاداعى ءتسۋناميدى باقىلاۋ جانە بولجاۋ ورتالىعى پارامۋشير جانە شۋمشۋ ارالدارىنا ءتسۋناميدىڭ جاقىنداعانىن حابارلادى. كەي جەرلەردە پەش مۇرجالارى مەن جەلدەتكىش جۇيەلەرى جارتىلاي قيراعان. جاعداي باقىلاۋدا, بارلىق قىزمەتتەر جۇمىسىن جالعاستىرىپ جاتىر. تۇرعىندار ەۆاكۋاتسيالاندى”, – دەپ مالىمدەدى مينيسترلىك.
ساحالين وبلىسىنداعى بالىق شارۋاشىلىعى كاسىپورىندارى قاۋىمداستىعىنىڭ پرەزيدەنتى ماكسيم كوزلوۆتىڭ ايتۋىنشا, تسۋناميدەن كەيىن سولتۇستىك-كۋريلسكىدەگى “الايد” بالىق شارۋاشىلىعى كاسىپورنىن سۋ باسىپ قالعان. “الايد” كاسىپورنىن قالپىنا كەلتىرۋگە قاتىستى ءبىر نارسە ايتۋ قيىن. سونداي-اق سولتۇستىك-كۋريلسك قالاسىنىڭ پورتى دا سۋ استىندا قالدى.
كامچاتكاداعى بالاباقشالاردىڭ بىرىندە جەر سىلكىنىسىنەن كەيىن قابىرعا قۇلاعان. ابىروي بولعاندا, زارداپ شەككەندەر جوق. بۇل تۋرالى ءوڭىر گۋبەرناتورى ۆلاديمير سولودوۆ حابارلادى. الەۋمەتتىك جەلىلەردە وقيعا ورنىنان تۇسىرىلگەن دەگەن بولجاممەن كادرلار تارادى.
