«توميريس پاتشايىمدى» مەكتەپكە شاقىرعان ديرەكتور جۇمىستان قۋىلدى

فوتو: سكرينشوت

جامبىل وبلىسى تەرەڭوزەك اۋىلىندا ءوزىن توميريس دەپ اتايتىن گۇلسارا كوپباەۆانى مەكتەپكە شاقىرىپ, ءىس-شارا وتكىزگەن ديرەكتور مەن ونىڭ تاربيە ءىسى جونىندەگى ورىنباسارى جۇمىستان قۋىلدى, دەپ حابارلايدى qandastar.kz Azattyq Rýhy  سىلتەمە جاساپ.

وقۋ-اعارتۋ ءمينيسترى عاني بەيسەمباەۆ مەكتەپتە وتەتىن ءىس-شارالاردىڭ بارىنە ءبىرىنشى كەزەكتە ديرەكتور جاۋاپتى ەكەنىن ايتا كەلە, ونىڭ تاربيە جونىندەگى ورىنباسارىنا قاتىستى قابىلدانعان شارانىڭ قايتا زەرتتەلەتىنىن ايتتى.

«بۇگىندە مەكتەپ باسشىسى جازالانىپ وتىر. ال, ەندى وتكەن شارالاردىڭ تاربيە جۇمىستارىنا بايلانىستى بولعانىنا وراي تاربيە جونىندەگى ورىنباسارىنا قابىلدانعان شەشىمنىڭ دۇرىستىعىن انىقتاۋ ءۇشىن تاپسىرما بەردىم. ءبىز كەز-كەلگەن مىقتى, تاجىريبەلى مامانداردى باعالاۋىمىز كەرەك. ەگەر راسىندا بۇل جاعدايعا تىكەلەي قاتىسى بار بولسا, زاڭ الدىندا جاۋاپكەرشىلىكتى موينىنا الۋى كەرەك. بىراق ءبىز مەكتەپ ديرەكتورىنىڭ تاربيە جونىندەگى ورىنباسارىنا قاتىستى ماسەلەنى زەردەلەپ كورەمىز», – دەدى مينيستر.

ەسكە سالايىق, جۋىردا جامبىل وبلىسىندا مەكتەپكە بارعان «توميريس پاتشايىمعا» قاتىستى اقپاراتقا ەل نازارىن اۋدارعان ەدىك. الدىمەن بۇل ادامنىڭ ەتەگىن وقۋشىلار كوتەرىپ جۇرگەنىن, كەيىن, مەكتەپ مۇعالىمدەرى ەمشىنى شاقىرۋ ءۇشىن 4000 مىڭ تەڭگەدەن اقشا جيناعانىن جازدىق. ماسەلە مينيسترگە دەيىن جەتىپ, تەكسەرۋ جۇرگەن بولاتىن.