«تورەشىلەر قولىمدى كوتەرمەدى»: ساكەن بيبوسىنوۆ وليمپياداداعى جەڭىلىسى تۋرالى

فوتو: سالي سابيروۆ

ساكەن بيبوسىنوۆ وليمپيادانىڭ جارتىلاي فينالىنا ءبىر قادام قالعاندا ءسۇرىندى

پاريج وليمپياداسىنىڭ شيرەك فينالندا جارىس جولىنان شىعىپ قالعان قازاقستاندىق بوكسشى ساكەن بيبوسىنوۆ جەڭىلىسى تۋرالى ايتتى.

«كوردىڭىزدەر, قولىمنان كەلگەننىڭ ءبارىن جاسادىم. وكىنىشتى, 3:2 ەسەبىمەن ۇتىلىپ قالدىم. قارسىلاسىمدى جەڭىسىمەن قۇتتىقتايمىن. ساتتىلىك تىلەيمىن! باستى قارسىلاس وسى ەدى. ونى ۇتقاندا كەم دەگەندە قولا بولاتىن ەدى. ءبارى اللانىڭ قالاۋىمەن عوي. اللاعا شۇكىر وسىنداي وليمپياداعا كەلىپ ەلىمنىڭ نامىسىن قورعاعانىما. اتتەڭ-اي, ەلدىڭ نامىسىن ابىرويمەن قورعاي المادىم دەپ ويلايمىن», – دەيدى بوكسشى.

شيرەك فينالدا باستى قارسىلاسىمەن جولى تۇيىسكەن ول قاتەلىكتەر بولعانىن مويىندايدى.

«مەدال ءۇشىن كەلگەن بولاتىنمىن. التىن مەدال ءۇشىن. توكيودا قولا العان سوڭ, وسى جاققا تىڭعىلىقتى دايىندالدىم. قاتەلىكتەر بولدى. سولارمەن جۇمىس ىستەيمىز. ماعان سەنىم ارتقان, مەنى قولداعان بارشا قازاقستاندىققا, ۇيىيدەگى اناما, كەلىنشەگىمە, وتباسىما, اعالارىما العىس ايتامىن. وكىنىشتى, بىراق التىنعا جەتە المادىم. تورەشىلەر قولىمدى كوتەرگەن جوق. مەن شارشى الاڭ ىشىندەگى جۇمىسقا جاۋاپ بەرەمىن. تورەشىلەر سولاي شەشتى, قۇتتى بولسىن!», – دەيدى بيبوسىنوۆ.

ەسكە سالا كەتەيىك, 51 كەلىدە قولعاپ تۇيىستىرەتىن ساكەن بيبوسىنوۆ وزبەكستان بوكسشىسى, وليمپيادا چەمپيونى حاسانبوي دۋسماتوۆتان جەڭىلىپ قالعان بولاتىن. ناتيجەسىندە قازاقستان قۇراماسىنان وليمپيادانىڭ جارتىلاي فينالىنا تەك نۇربەك ورالباي شىقتى.