جاڭالىقتار
ءتورت اياقتى ادامدار قاتارى كوبەيىپ بارادى: دەپۋتات اتا-انالارعا ۇندەۋ جاسادى
سۋرەت: اشىق دەرەككوزدەن
قازىر جاسوسپىرىمدەر اراسىندا كۆادروۆەر اتالاتىن جاڭا ترەند پايدا بولدى, دەپ حابارلايدى Qandastar.kz.
ءماجىلىس دەپۋتاتى داۋلەت مۇقاەۆ ءوزىنىڭ الەۋمەتتىك پاراقشاسىندا جاستار اراسىندا تەرىس ارەكەتتەرگە تاۋەلدىلىك بەلەڭ الىپ بارا جاتقانىن ايتىپ دابىل قاقتى. ول مىسىق, تۇلكى, سىلەۋسىن بوپ كيىنىپ, كوگالداردا ءتورت اياقتاپ سەكىرىپ, كەيدە ءوتىپ بارا جاتقانداردى تىستەۋى دە مۇمكىن ەكەنىن ايتتى.
– اتا-انالارعا ۇندەۋ. اي وتكەن سايىن ءتورت اياقتى ادامدار قاتارى كوبەيىپ بارادى. ءيا, ولار مىسىققا, يتكە, قاسقىر, سىلەۋسىنگە ەلىكتەپ سولاردىڭ كۇيىن كەشۋدە (مياۋلايدى, ۇرەدى, ۇليدى).
ءتىپتى, تاماعىن جەيدى. شەتەلدەردە ءتورت اياقتى حايۋانعا ەلىكتەگەندەردىڭ ادامداردى تىستەگەن, تىرناعان ارەكەتتەرى تىركەلگەن. وسىلايشا, ادامدار ادامشىلىققا ەمەس ناعىز ايۋاندىققا قادام باسىپ جاتىر. بۇل ءبىر جۇقپالى اۋرۋداي. اسىرەسە, جاسوسپىرىمدەر ءبىر-بىرىنەن كورىپ ەلىكتەۋدە. اتا-انالارعا دابىل قاعىپ جاتقانىم دا وسىدان. بۇل سۋبمادەنيەت. بۇنىڭ ارتىندا وزگە كۇشتەردىڭ ۇلكەن بيزنەسى تۇر. ساق بولىڭىزدار. كۆادروبەرلەردىڭ ارەكەتىن ءبىزدىڭ ورگاندار مۇقيات زەرتتەۋ كەرەك. كەرەك دەسەڭىزدەر, ءبىز تاراپتان (پارلامەنت) ارنايى زاڭ شىعارۋعا دا دايىنبىز, – دەدى دەپۋتات.
جاڭا ترەندكە ىلەسكەندەردىڭ اراسىندا قازاقستاندىقتار دا جوق ەمەس. كۆادروبەرلەر قازاقستاندا دا بار. ايتا كەتۋ كەرەك, كۆادروبيكا – اەروبيكا ەلەمەنتتەرى ارالاسقان بەيرەسمي سپورت. اتالعان سپورت جايىندا العاش رەت 2008 جىلى ايتىلا باستادى. ودان كەيىن جاپوندىق سپرينتەر كەنيچي يتو ءتورت اياقتاپ ءجۇز مەتردى 18,58 سەكۋندتا جۇگىرىپ ءوتىپ, رەكورد ورناتتى. 2022 جىلى امەريكالىق كولين ماكليۋر قاشىقتىقتى ودان دا جىلدام جۇگىرىپ ءوتتى.
