Tórt aıaqty adamdar qatary kóbeıip barady: Depýtat ata-analarǵa úndeý jasady

sýret: ashyq derekkózden

Qazir jasóspirimder arasynda kvadrover atalatyn jańa trend paıda boldy, dep habarlaıdy Qandastar.kz.

Májilis depýtaty Dáýlet Muqaev óziniń áleýmettik paraqshasynda jastar arasynda teris áreketterge táýeldilik beleń alyp bara jatqanyn aıtyp dabyl qaqty. Ol mysyq, túlki, sileýsin bop kıinip, kógaldarda tórt aıaqtap sekirip, keıde ótip bara jatqandardy tisteýi de múmkin ekenin aıtty.

– Ata-analarǵa úndeý. Aı ótken saıyn tórt aıaqty adamdar qatary kóbeıip barady. Iá, olar mysyqqa, ıtke, qasqyr, sileýsinge eliktep solardyń kúıin keshýde (mıaýlaıdy, úredi, ulıdy).

Tipti, tamaǵyn jeıdi. Shetelderde tórt aıaqty haıýanǵa eliktegenderdiń adamdardy tistegen, tyrnaǵan áreketteri tirkelgen. Osylaısha, adamdar adamshylyqqa emes naǵyz aıýandyqqa qadam basyp jatyr. Bul bir juqpaly aýrýdaı. Ásirese, jasóspirimder bir-birinen kórip elikteýde. Ata-analarǵa dabyl qaǵyp jatqanym da osydan. Bul sýbmádenıet. Bunyń artynda ózge kúshterdiń úlken bıznesi tur. Saq bolyńyzdar. Kvadroberlerdiń áreketin bizdiń organdar muqııat zertteý kerek. Kerek deseńizder, biz taraptan (Parlament) arnaıy zań shyǵarýǵa da daıynbyz, – dedi depýtat.

Jańa trendke ileskenderdiń arasynda qazaqstandyqtar da joq emes. Kvadroberler Qazaqstanda da bar. Aıta ketý kerek, kvadrobıka – aerobıka elementteri aralasqan beıresmı sport. Atalǵan sport jaıynda alǵash ret 2008 jyly aıtyla bastady. Odan keıin japondyq sprınter Kenıchı Ito tórt aıaqtap júz metrdi 18,58 sekýndta júgirip ótip, rekord ornatty. 2022 jyly amerıkalyq Kolın Maklıýr qashyqtyqty odan da jyldam júgirip ótti.