«ءتورت بالا اكەسىز قالدى»: الماتىدا كوز جۇمعان پوليتسەي مەيرامحانادا ايەلگە اراشا تۇسكەن

فوتو: ۆيدەو سكرين

الماتىداعى مەيرامحانادا ايەلگە اراشا تۇسەمىن دەپ پوليتسەي قازا تاپتى. ەر ادامنىڭ ارتىندا ءتورت بالاسى قالدى. بۇل تۋرالى  qandastar.kz اقپارات اگەنتتىگى كتك ارناسىنا سىلتەمە جاساپ حابارلايدى. 

قاندى قىلمىس قالاداعى تانىمال مەيرامحانالاردىڭ بىرىندە تۇنگى ۋاقىتتا بولعان. باقىلاۋ كامەراسىنا نۇرسۇلتان نەسىپباەۆتىڭ بەيتانىس ايەلدى قالاي قورعاۋعا تىرىسقانى جازىلعان. اياۋسىز سوققىلاپ جاتقان ەر ادامعا ەسكەرتۋ جاساپ, سىرتقا شىعىپ كەتەدى. ءسويتىپ ارالارىندا جانجال تۋىنداپ, ارتى پوليتسەيدىڭ ولىمىمەن اياقتالدى.

مارقۇمنىڭ ءمايىتى تۋعان جەرى بايقوڭىرعا جەتكىزىلگەن. مارقۇم نۇرسۇلتان نەسىپباەۆقا ءۇش رەت پىشاق سۇققان كۇدىكتى بىردەن قاماۋعا الىندى. ول وزگە ەل ازاماتى بوپ شىقتى.

“قازاقتىڭ قىزىن قورعايمىن دەپ, ءومىرى قىرشىننان قيىلدى. جولداسىممەن كورەتىن جاقسىلىعىمىز ءالى الدا ەدى عوي, العا قويعان ماقساتتارىمىز بولدى. مىنا بالا-شاعانى وسىرەمىز دەگەن ماقساتىمىز بار ەدى. جاقسىلىققا ۇمتىلدىق. ەندى وكىنىشتى, جاستايىنان ءومىرى قيىلدى”, – دەدى مارقۇمنىڭ ايەلى باقىت جەتىگەن.

31 جاستاعى پوليتسەي مەيرامحانادا جۇمىستان تىس ۋاقىتتا ءجۇرىپتى. ءىش قۇرىلىسى مەن جۇرەك تۇسىنان پىشاق جاراقاتىن العان ازامات اۋرۋحاناعا جەتكىزىلە سالىسىمەن كوز جۇمعان.

“جولداستارىنىڭ الدىندا ابىرويلى, باۋىرمال, اعايىننىڭ ورتاسىندا قامقورشىمىز ەدى, بالام. بالاما كوپ ارقا سۇيەيتىن ەدىم. ءوزىمىزدىڭ قازاقتىڭ قىزىن قورعايمىن دەپ, ءوزىنىڭ ءومىرىن قيىپ, ارتتا اڭىراتىپ مەنى قالدىردى. ءتورت بالاسى, كەلىنشەگى قالدى. مەن بالامدى ماقتان تۇتامىن”, – دەدى مارقۇمنىڭ اناسى رايا جاقانوۆا.

نۇرسۇلتان نەسىپباەۆ ون جىلدان بەرى ىشكى ىستەر سالاسىندا قىزمەت اتقارعان. ارىپتەستەرى ەر ادامنىڭ جۇمىسقا ادال, جاناشىر ازامات بولعانىن ايتىپ وتىر.

“مەن نۇرسۇلتاندى 2017 جىلدان باستاپ تانيمىن. ەكەۋىمىز جۇمىستى بىرگە باستاعانبىز. ناعىز جەدەل ۋاكىل دەپ ايتۋعا بولادى. جۇمىسىنا ادال, بەرىك بولاتىن. ءاردايىم ادامدارعا كومەكتەسىپ جۇرەتىن جانە دە وتە اشىق جىگىت بولاتىن. قاندى قىلمىس جاسادى دەگەن كۇدىكتى قولعا ءتۇسىپ, قاماۋعا الىندى”, – دەدى مەدەۋ اۋدانى پب اعا جەدەل ۋاكىلى باعدات قۇرامىسوۆ.

پوليتسيانىڭ ايتۋىنشا, ول وزبەكستان ازاماتى ەكەن.

“قاتارلاس قىزمەتتىك تەكسەرۋ جۇرگىزىلىپ جاتىر. پوليتسيا قىزمەتكەرى جۇمىستا ەمەس ەدى. قىلمىستىق ءىستىڭ باسقا دا ءمان-جايى قىلمىستىق ءىس جۇرگىزۋ كودەكسىنىڭ 201-بابىنىڭ تالاپتارىنا ساي جاريا ەتىلمەيدى”, – دەدى الماتى پد رەسمي وكىلى سالتانات ازىربەك.