جاڭالىقتار
ءتورت كومپرەسسور: تەڭىزدەن 34,7 ميلليون توننا مۇناي الۋ قازاقستانعا نە بەرەدى?
فوتو: اشىق دەرەككوز
قازاقستانداعى ەڭ ءىرى مۇناي كومپانياسى بولىپ تابىلاتىن تەڭىزشەۆرويل بولاشاق كەڭەيتۋ جوباسىنىڭ العاشقى ناتيجەلەرىن كورە باستادى. وسى جوبا ءوزىنىڭ تولىق قۋاتىنا جەتكەن ۋاقىتتان باستاپ, قازاقستان كۇنىنە 1 ميلليون باررەل مۇناي وندىرەتىن بولادى, دەپ جازدى qandastar.kz
بىلتىر تەڭىز كەنىشىنەن 27,8 ملن توننا مۇناي الىنسا, بيىل كەڭەيتۋدىڭ ارقاسىندا 34,7 ملن توننا مۇناي شىقپاق. بۇل – 253,3 ميلليون باررەل KEBCO سورتتى مۇناي. نارىقتاعى قازىرگى باعاسى 19 ميلليارد دوللاردان اسار ەدى. بىلتىر قازاقستان بارلىق كەن ورىندارىن ەسەپكە العاندا 87,7 ميلليون توننا مۇناي نەمەسە 640 ميلليون باررەل مۇناي ءوندىردى. ول ونىڭ الدىندا مەجەلەنگەن جوسپاردان از بولىپ شىقتى. بيىلعا 96,2 ملن توننا مۇناي (505 مىڭ باررەل) دەگەن جوسپار قويىلىپ وتىر. ءوسىمنىڭ نەگىزگى بولىگىن تەڭىز كەنىشى قامتاماسىز ەتۋى ءتيىس.
Chevron كومپانياسى تەڭىزدىڭ پبر-پۋد جوباسى ىسكە قوسىلعاننان كەيىن, 2025 جىلى «تەڭىزشەۆرويلدىڭ» تازا اقشالاي اعىنى 8 ميلليارد اقش دوللارىن, ال 2026 جىلدان باستاپ 10 ميلليارد دوللاردى قۇرايدى دەپ بولجايدى.
dalainside حابارلاعانداي, قازاقستان بيىل كوبىرەك مۇناي وندىرەتىنى انىق. بىراق الەمدىڭ نارىقتاردا مۇناي باعاسىنىڭ ءتۇسىپ كەتۋ قاۋپى وسى ءوندىرىستىڭ ارتۋىن, كەڭەيتۋ جوباسىنا سالىنعان ينۆەستيتسيانىڭ قايتۋىن قيىنداتۋى مۇمكىن. اقش پرەزيدەنتى دونالد ترامپ پەن وپەك قانداي قيمىلعا بارارى دا بەلگىسىز. ترامپ مۇناي باعاسىن تەك وپەك ارقىلى تۇسىرە الادى. بىراق وپەك+ كەلىسىمى كەزىندە مۇناي باعاسىن ارزانداتپاي ۇستاپ تۇرۋ ءۇشىن مۇناي ءوندىرۋ كولەمىن شەكتەۋگە باعىتتالعان ەدى. وپەك اقش ايتتى دەپ ءوز باعىتىن 180 گرادۋسقا وزگەرتە مە? ول جاعىن ەشكىم تاپ باسىپ بىلە المادى. قازاقستان بارىنشا كوپ مۇناي ءوندىرىپ, ودان كوبىرەك پايدا تابۋعا نيەتتى. سەبەبى, جىلدا قايتالاناتىن بيۋدجەتتىك دەفيتسيت ۇلتتىق قور قازىناسىن ايتارلىقتاي جۇدەتىپ تاستاعان بولاتىن. مۇناي ءوندىرۋ كولەمىنىڭ ارتۋىن پايدالانىپ, ۇلتتىق قوردى كەمىندە 10 ميلليارد دوللارعا تولتىرىپ قويۋ قاجەت. تشو – قازاقستاننىڭ نەگىزگى ءۇمىتى بولىپ وتىر. كەڭەيتۋ جوباسىنىڭ اياسىندا 4 كومپرەسسور قويىلىپ, 5 گازوتۋربيندى گەنەراتور ورناتىلعان. ۇكىمەت ولار ىستەن شىقپاي, تۇراقتى تۇردە قىسىم بولسا دەپ ارماندايدى. ءبىر نارسە انىق – قازاقستان تشو كەڭەيۋى جوباسىنان پايدا كورۋ ءۇشىن الەمدىك نارىقتا مۇناي باعاسى باررەلىنە 70 دوللاردان تۇسپەۋ قاجەت. سەبەبى, بيىل فيۋچەرستەر قۇلايتىن بولسا, ەل بيۋدجەتى اۋىر جاعدايدا قالادى.
