قارجى جانە تولەمدەر
«ءتورت ملن تەڭگە قارىز»: تارازدا 5 جىلدان بەرى بالاسىنا اليمەنت تولەمەگەن ادام سوتتالماق
فوتو: اشىق دەرەككوز
جامبىل وبلىسىندا 2019 جىلدان بەرى اليمەنت تولەۋدەن جالتارىپ جۇرگەن ادام انىقتالدى. سول سياقتى وڭىرلىك پروكۋرورلار اليمەنت بويىنشا بورىشكەرگە قاتىستى سوتقا دەيىنگى تەرگەپ-تەكسەرۋ جۇرگىزىپ جاتىر, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.
پروكۋراتۋرا مالىمەتىنشە, تالداۋ اياسىندا 2019 جىلدان بەرى دالەلدى سەبەپتەرسىز 4 ملن تەڭگەدەن استام اليمەنت بەرەشەگىن تولەمەگەن بورىشكەردى انىقتادى.
«سوت شەشىمىنىڭ تيىسىنشە ورىنداماعانى ءۇشىن بورىشكەر بىرنەشە رەت اكىمشىلىك جاۋاپكەرشىلىككە تارتىلعان. 09.09.2024 جىلى وسى فاكتى بويىنشا قالا پروكۋراتۋراسى قك-ءنىڭ 139-بابى بويىنشا سوتقا دەيىنگى تەرگەپ-تەكسەرۋدى باستادى. قپك-ءنىڭ 201-بابىنا سايكەس وزگە دە اقپارات جاريا ەتۋگە جاتپايدى.
2024 جىلدىڭ وتكەن كەزەڭىندە قالا پروكۋراتۋراسى 30 بورىشكەردى اكىمشىلىك جاۋاپكەرشىلىككە تارتىپ, 41 ملن تەڭگە كولەمىندە اليمەنت بەرەشەگىن ءوندىردى.
پروكۋراتۋرا اليمەنت تولەۋدەن جالتارعان بورىشكەرلەرگە قك-ءنىڭ 139-بابىنا سايكەس 2 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعانىن ەسكەرتەدى», – دەلىنگەن حابارلامادا.
