«ءتورت ساعاتقا سۇرانعان»: اقمولا وبلىسىندا جۇمىسسىز قالعان ايەل سوت شەشىمىمەن قايتادان جۇمىسقا الىندى

فوتو: istockphoto.com

اقمولا وبلىسىندا زاڭسىز جۇمىستان شىعارىلعان كوپبالالى انا سوت شەشىمىمەن قايتادان جۇمىسقا الىندى, دەپ حابارلايدى Azattyq Rýhy.

اقمولا وبلىستىق سوتىنىڭ ازاماتتىق ىستەر جونىندەگى سوت القاسى «پ.» جشس-نە جۇمىستان بوساتۋ تۋرالى بۇيرىقتى زاڭسىز دەپ تانۋ, جۇمىسقا قايتا الۋ جانە جالاقىنى تولەۋ تۋرالى «ا.»-نىڭ تالاپ قويۋى بويىنشا ازاماتتىق ءىس قارادى.

سوتتا انىقتالعانداي, كوپبالالى انا «ا.» 2023 جىلدىڭ قىركۇيەگىنەن جشس-دا دۇكەندە اعا كاسسير بولىپ جۇمىس ىستەگەن. 2024 جىلدىڭ 4 ناۋرىزىندا «ا.» دۇكەننىڭ ديرەكتورىنان سۇرانىپ جانە ءوز ورنىنا ارىپتەسىن جۇمىسقا شىعارىپ, جۇمىس ورنىندا ساعات 15.00-دەن 19.00-گە دەيىن بولماعان. بىراق ديرەكتور «ا.»-نىڭ جۇمىستا بولماعانى تۋرالى اكت جاساپ, تۇسىندىرمە جازدىرتىپ, ونى جۇمىستان شىعارۋ تۋرالى بۇيرىق جازعان.

«سوت«ا.» باسشىنىڭ رۇقساتىمەن, ونى ارىپتەسى اۋىستىرىپ, بەلگىلى سەبەپپەن جۇمىس ورنىندا بولماعانىن,  جۇمىستان بوساتۋعا نەگىز بولاتىن تارتىپتىك جازا ورىن الماعانىن, «ا.» ديرەكتوردان سۇرانعانىن كۋاگەرلەر مەن دۇكەندەگى قىزمەتكەرلەردىڭ راستاعانىن, تارتىپتىك جازا قولدانۋ ءراسىمى بۇزىلعانىن (بۇيرىقتا جۇمىستان بوساتۋدىڭ نەگىزى كورسەتىلمەگەن, تەك ەڭبەك كودەكسىنىڭ 49-بابىنىڭ 3-تارماقشاسىنا سىلتەمە جاسالعان) ەسكەرە وتىرىپ «ا.»-نى جۇمىستان شىعارۋ تۋرالى بۇيرىقتى كەلەسى نەگىزدەرمەن زاڭسىز دەپ تانىدى», – دەلىنگەن سوت حابارلاماسىندا.

سوت شەشىمىمەن «ا.»-نىڭ تالاپ قويۋى قاناعاتتاندىرىلدى, جۇمىستان شىعارۋ تۋرالى بۇيرىق جارامسىز دەپ تانىلىپ, «ا.» بۇرىڭعى جۇمىس ورنىنا قايتا الىندى, جشس-دان «ا.»-نىڭ پايداسىنا 895 520 تەڭگە بوس جۇرۋگە ءماجبۇر بولعانى ءۇشىن جالاقى ءوندىرىلدى.

القانىڭ قاۋلىسىمەن سوت شەشىمى وزگەرىسسىز قالدىرىلدى.

جۇمىسقا قايتا ورنىنا الۋ جانە جالاقى تولەۋ تۋرالى شەشىم دەرەۋ ورىندالۋعا جاتادى.

سوت شەشىمى زاڭدى كۇشىنە ەندى.