جاڭالىقتار
ءتورت جىلدىڭ ىشىندە قازاق اسكەرىندە 310 سارباز كوز جۇمعان
فوتوكوللاج: Azattyq Rýhy
2020 جىلدان بەرى اسكەردە قازا تاپقان ساربازداردىڭ سانى 310 ادامعا جەتكەن, دەپ حابارلايدى qandastar.kz Atameken business ارناسىنا سىلتەمە جاساي وتىرىپ.
قورعانىس مينيسترلىگى بەيبىت كۇندە قىناداي قىرىلىپ جاتقان جاس جىگىتتەردىڭ ولىمىنە ءتۇرلى سەبەپتەردى اتايدى: اۋرۋ-سىرقاۋ, سۋيتسيد, جول-كولىك وقيعاسى, تاعى باسقالار.
وتان الدىنداعى بورىشىن وتەۋگە اتتانعانداردىڭ ءولىمى جىلدان-جىلعا ارتىپ كەلە جاتقانىن ايتا كەتكەن ءجون. باس اسكەري پروكۋروردىڭ ءبىرىنشى ورىنباسارى ماقسات قازيەۆ بىلتىر 2020 جىل مەن 2023 جىل ارالىعىندا ارميادا 270 ساربازدىڭ باقيلىق بولعانىن مالىمدەگەن ەدى.
ءتورت جىلدا 310 ساربازدان ايىرىلساق, جىلىنا 77 جاس جىگىت قىرشىنىنان قيىلادى دەگەن ءسوز, ولاي بولسا اپتاسىنا ءبىر سارباز جان تاپسىرادى دەپ توپشىلاۋعا بولادى.
كەشە عانا ماڭعىستاۋ وبلىسىندا قاتارداعى جاۋىنگەر مارات بارقۇلوۆ كىسى قولىنان قازا تاپتى. ونى ويماشا پوليگونىندا گۆارديا لەيتەنانتى تاپانشامەن اتىپ سالعان. جالعىز ۇلىنان ايىرىلعان اكە كىنالى ادامنىڭ ءادىل جازالانۋىن شىرىلداپ سۇراپ, قۇزىرەتتى ورگاندارعا ۆيدەووتىنىش جولداپ ءجۇر. الەۋمەتتىك جەلىدە «بالامدى اسكەرگە جىبەرمەيمىن» دەگەن سارىنداعى پىكىرلەرگە كوز شالىنادى. قازاق ۇلدارىنان ءپاتريوتيزمدى, ەل مەن جەرگە دەگەن ادالدىقتى سۇراۋ ءۇشىن ارمياعا ءتارتىپ ەنگىزىپ, ءبىر ىزگە سالۋدى بيلىك ورگاندارى مىندەتىنە الۋى ءتيىس دەپ سانايدى حالىق.
سونىمەن قاتار, پەتيتسيالار سايتىندا مىندەتتى اسكەري قىزمەتتى جويۋ تۋرالى باستاما پايدا بولعانىن جازعان ەدىك. پەتيتسيا 2024 جىلدىڭ 21 قىركۇيەگىنە دەيىن تالقىلانادى. ەگەر ول 50 مىڭ قول جيناسا, قورعانىس مينيسترلىگى ءوتىنىشتى قاراۋعا مىندەتتى.
