«توسەككە كۇشتەپ تارتتى»: تۇركىستاندا 15 جاستاعى قىز اسكەري قىزمەتكەردەن جۇكتى بولىپ قالعانىن ايتتى

تۇركىستان وبلىسىندا اسكەري قىزمەتكەردەن جۇكتى بولىپ قالعان قىز 16 جاسىندا بوساندى. كامەلەتكە تولماعان جابىرلەنۋشى جىنىستىق قاتىناسقا ماجبۇرلەگەن اسكەري قىزمەتكەر ءتيىستى جازاسىن الۋىن تالاپ ەتىپ وتىر.  بۇل تۋرالى  qandastar.kz اقپارات پورتالى 31-ارنانىڭ ينفورمبيۋرو جاڭالىقتار قىزمەتىنە سىلتەمە جاساپ حابارلايدى.

16 جاسىندا انا اتاعان تۇركىستان وبلىسىنىڭ تۇرعىنى 23 جاستاعى اسكەري قىزمەتكەرمەن بىلتىر كوكتەمدە تانىسقان. ونىڭ ايتۋىنشا, اۋەلى الەۋمەتتىك جەلىدە سويلەسكەن ەكەۋى كەيىن كەزدەسىپ, سوڭىندا ەر ادام پاتەرگە ەرتىپ اپارعان.

“كۇشپەن جىنىستىق قاتىناس بولدى. “ەشكىمگە ايتپا. جۇمىستان شىعارىپ جىبەرەدى. مەن ورگاندا ىستەيتىن اداممىن بىلەسىڭ” دەدى. 15 جاسىمدا كوتەرەمىن. اۋرۋحاناعا ەسەپكە تۇرۋعا بارعان كەزدە اۋداندىق ىشكى ىستەر باسقارماسىن شاقىردى. تەرگەۋشى ءىس قوزعالاتىنىن ايتتى”, – دەيدى جابىرلەنۋشى.

جىگىتتىڭ جاقىندارى جاعدايدى ۋشىقتىرماۋعا كوندىرىپ, قىزعا سىرعا سالىپ الىپ كەتكەن كورىنەدى. بىراق بويجەتكەن بالا كوتەرىپ, قىلمىستىق ءىس قوزعالعان. وسىلايشا, جۇكتى قىز ۇيىنە كەرى قايتىپتى.

پوليتسيا ءىس قوزعاعانىمەن تەرگەۋ سوزبالاڭعا سالىنىپ, بەس ايدان بەرى جىلجىماعان.

“5 ايدان بەرى ەشتەڭە ىستەپ جاتقان جوق. ءبارى قىسقارتىپ تاستادى. “تابىلادى, تابىلادى” دەيدى تەرگەۋشلەر. بالانى جەتىسايدان شىقپاعان دەپ وتىر. جەتىساي الاقانداي جەر عوي. تاۋىپ السا جەتى اتاسىمەن تاۋىپ الادى عوي. ىزدەپ جاتىرمىز دەيدى بولدى تەك”, – دەيدى اشىنعان قىز.

كامەلەت جاسىنا تولماعان قىز ءبىر اي بۇرىن بوسانعان. قازىر كىشكەنتاي ءسابيىن اكەسىز ءوزى باعىپ وتىر. ال پوليتسيا تەرگەۋ جۇرگىزىلىپ جاتقانىن جەتكىزدى. بىراق وزگە اقپاراتتى جاريا ەتپەدى.

“اتالعان فاكتى بويىنشا قىلمىستىق ءىس قوزعالدى. بارلىق ءمان-جايدى انىقتاۋ ءۇشىن تەرگەۋ ارەكەتتەرى جۇرگىزىلۋدە, ونىڭ قورىتىندىسىمەن پروتسەسسۋالدىق شەشىم قابىلدانادى”, – دەپ مالىمدەدى تۇركىستان وبلىسى پوليتسيا دەپارتامەنتى.

پسيحولوگيالىق سوققى العان ءجاسوسپىرىم كوشەگە شىعۋدان قالعان. ءتىپتى, وزىنە قول جۇمساماق بولعان. الايدا تۋىستارى دەر كەزىندە اراشا تۇسكەن ەكەن.