توزاق تۋرالى ۋاعىز ايتا بەرگەن: يمام ايەلىن قاماپ ۇستاپ, ونى ۇرىپ-سوعىپ اۋرۋ قىلعان دەگەن اقپارات تارادى

فوتو: اشىق دەرەككوز

جەلىدە اقتوبە وبلىسى قاندىاعاش قالاسىندا بۇرىنعى يمام, تەولوگ ءتورت بالاسىنىڭ اناسىنا زورلىق-زومبىلىق كورسەتكەنى تۋرالى اقپارات تارادى. بۇل تۋرالى Alash.kz ۇلتتىق پورتالى Stan.kz اقپارات اگەنتتىگىنە سىلتەمە جاساپ حابارلايدى.

جابىرلەنۋشىنىڭ ءسىڭلىسىنىڭ ايتۋىنشا, تەولوگ جەزدەسى اپكەسىنە دىنمەن مانيپۋلياتسيا جاساپ, تۋىستارىمەن ارالاستىرماي, ۇيىندە قاماپ ۇستاعان.

«كۇيەۋى مەكتەپ كەزىندەگى دوستارىمەن سويلەسۋگە دە تىيىم سالدى. سۇيىكتى ىسىمەن اينالىستىرمادى. ايەلدەردىڭ ءبارى حارام دەپ, ولارمەن دە ارالاستىرمادى. سونداي-اق بىرىڭعاي جىن مەن توزاق تۋرالى ۋاعىز ايتىپ, ايتقانىمدى ورىنداماساڭ, رازىلىعىمدى المايسىڭ دەپ ۇرىپ-سوققان. اپكەمنىڭ تۇك جازىعى جوق. وتە جۋاس بولدى. ءدىندى جاقسى ۇستانىپ, كۇيەۋىنىڭ رازىلىعىن الامىن دەپ, ايتقانىن ەكى ەتپەدى. سوڭىندا باعىنىشتى بولىپ, ءوزى اۋرۋ بولىپ قالدى. اۋرۋعا شالدىققانىن بىلسە دە, كۇيەۋى مەديتسينا قىزمەتىنە جۇگىنبەي, ءدىن قىزمەتكەرلەرىن شاقىرىپ ءوز بەتتەرىنشە ەمدەمەك بولعان. وسىلايشا اپكەمنىڭ اۋرۋى اسقىنىپ كەتكەن», – دەيدى ءسىڭلىسى.

سونداي-اق ول قازىر اپكەسىنىڭ وزىمەن بىرگە تۇرىپ جاتقانىن ايتتى.

«قازىر اپكەم ءتورت بالاسىمەن جانىمدا. ال تەولوگ كۇيەۋى ءوز جۇمىسىن جالعاستىرىپ جاتىر. اپكەم اۋرۋعا شالدىققان سوڭ كۇيەۋى تاستاپ كەتتى», – دەيدى ول.