ترامپ اكىمشىلىگى ءجۋرناليستتى قۇپيا چاتقا قوسىپ جىبەرگەن

فوتو: Reuters

اقش ۇلتتىق قاۋىپسىزدىك جونىندەگى كەڭەسشىسى مايك ۋولتتس قىزمەتىنەن ايىرىلۋى مۇمكىن. سەبەپ – ونىڭ يەمەندىك حۋسيتتەرگە قارسى اسكەري وپەراتسيانى تالقىلاعان جابىق چاتقا The Atlantic باسىلىمىنىڭ باس رەداكتورىن قاتەلەسىپ قوسىپ جىبەرۋى, دەپ حابارلايدى qandastar.kz Politico.com-عا سىلتەمە جاساپ.

بۇل جاعداي اق ۇيدە ۇلكەن دۇربەلەڭ تۋدىردى. سەبەبى بۇل چاتتا اقش قورعانىس ءمينيسترى پيت حەگسەت, ۆيتسە-پرەزيدەنت دجەي دي ۆەنس, ۇلتتىق بارلاۋ ديرەكتورى تۋلسي گاببارد جانە باسقا جوعارى لاۋازىمدى تۇلعالار بولعان. باس رەداكتور دجەففري گولدبەرگ چاتقا 11 ناۋرىز كۇنى Signal قوسىمشاسى ارقىلى شاقىرتۋ الىپ, “Houthi PC small group” دەگەن اتپەن تىركەلگەن توپقا قوسىلعان.

اق ءۇي اكىمشىلىگى بۇل ماسەلەگە بايلانىستى ەكىگە ءبولىندى: كەيبىر شەنەۋنىكتەر ۋولتتستىڭ وتستاۆكاعا كەتۋىن تالاپ ەتسە, باسقالارى ونى قولداپ وتىر.

الايدا كەيبىر اقپارات كوزدەرى ترامپ قوعام رەاكتسياسىنا بايلانىستى كوزقاراسىن وزگەرتۋى مۇمكىن ەكەنىن ايتادى.

اقش كونگرەسى دە بۇل جاعدايعا الاڭداۋشىلىق ءبىلدىردى. وكىلدەر پالاتاسىنىڭ مۇشەسى دون بەيكون قۇپيا اقپاراتتىڭ قورعالماعان ارنا ارقىلى تاراتىلۋىن “كەشىرىلمەيتىن قاتەلىك” دەپ اتادى. سەناتور رودجەر ۋيكەر بولسا, قارۋلى كۇشتەر كوميتەتى ارنايى تەكسەرۋ باستايتىنىن جەتكىزدى.

بۇل جانجال ۋولتتسقا قاتىستى سىننىڭ كۇشەيۋىنە سەبەپ بولدى, اسىرەسە رەسپۋبليكالىق پارتيا ىشىندەگى يزولياتسيونيستەر ونى نەوكونسەرۆاتورلارمەن بايلانىسى بار دەپ كۇدىكتەنۋدە. دەگەنمەن, كەيبىر رەسپۋبليكاشىلدار, ونىڭ ىشىندە وكىلدەر پالاتاسىنىڭ سپيكەرى مايك دجونسون ۋولتتستى قولدايتىنىن ءبىلدىردى.

قازىرگى ۋاقىتتا ۋولتتستىڭ تاعدىرى بەلگىسىز كۇيدە قالىپ وتىر. شەشىمدى الداعى كۇندەرى پرەزيدەنت ترامپتىڭ ءوزى قابىلدايدى.