ترامپ پەن پۋتين تاعى دا تەلەفون ارقىلى تىلدەستى

بۇل تۋرالى رەسەي پرەزيدەنتىنىڭ كومەكشىسى يۋري ۋشاكوۆ مالىمدەدى. ونىڭ سوزىنشە, قوس پرەزيدەنت اراسىنداعى اڭگىمە شامامەن 40 مينۋتقا سوزىلعان, دەپ حابارلايدى Qandastar.kz

– بۇگىن, جارتى ساعات عانا بۇرىن اقش پرەزيدەنتىنىڭ باستاماسىمەن ۆلاديمير پۋتين مەن دونالد ترامپ اراسىندا تەلەفون ارقىلى اڭگىمە ءوتتى, – دەدى ۋشاكوۆ باق وكىلدەرىنە.

اقش باسشىسى پۋتينگە اق ۇيدە وتكەن كەلىسسوزدەر قورىتىندىسى تۋرالى بايانداعان. ءسوز اراسىندا ۋكراينا پرەزيدەنتى ۆلاديمير زەلەنسكيمەن جانە ەۋروپا ەلدەرىنىڭ كوشباسشىلارىمەن جۇرگىزىلگەن كەزدەسۋدىڭ ءمان-جايىمەن بولىسكەن.

يۋري ۋشاكوۆ كەلەسى جايتتاردى اتاپ ءوتتى:

– قوس پرەزيدەنت ۋكراينا مەن رەسەي دەلەگاتسيالارى اراسىنداعى تىكەلەي كەلىسسوزدەردى جالعاستىرۋدى قولدايتىنىن ءبىلدىردى;

– تاراپتار كەلىسسوزدەردە ماسكەۋ مەن كيەۆتىڭ وكىلدىك دەڭگەيىن ارتتىرۋ مۇمكىندىگىن قاراستىرۋ يدەياسىن تالقىلادى;

– ەكى ەلدىڭ باسشىلارى ۋكراينا ماسەلەسى جانە وزگە دە تاقىرىپتار بويىنشا بايلانىستى ۇزبەي جالعاستىرۋعا ۋاعدالاستى.

سونداي-اق, پۋتين الياسكادا وتكەن كەزدەسۋ بارىسىندا كورسەتىلگەن قوناقجايلىق ءۇشىن ترامپقا العىسىن ايتقان.

ەسكە سالايىق, ترامپتىڭ زەلەنسكيمەن جانە ەۋروپالىق كوشباسشىلارمەن كەزدەسۋى دۇيسەنبىدە اق ۇيدە ءوتتى.

كەزدەسۋگە ناتو باس حاتشىسى مارك ريۋتتە, ەۋروپا كوميسسياسىنىڭ توراعاسى ۋرسۋلا فون دەر ليايەن, ۇلىبريتانيا پرەمەر-ءمينيسترى كير ستارمەر, فرانتسيا پرەزيدەنتى ەممانۋەل ماكرون, گەرمانيا كانتسلەرى فريدريح مەرتس, فينليانديا پرەزيدەنتى الەكساندر ستۋبب, يتاليا پرەمەرى دجوردجا مەلوني جانە ۋكراينا پرەزيدەنتى ۆلاديمير زەلەنسكي قاتىسقان.

ترامپ بۇل كەلىسسوزدەردى «وتە ناتيجەلى» دەپ باعالاپ, ۋكرايناعا قاۋىپسىزدىك كەپىلدىكتەرىن بەرۋ ماسەلەسى تالقىلانعانىن پۋتينگە ايتىپ بەرگەن.