Tramp Pentagonnyń atyn «Soǵys mınıstrligi» dep ózgertpek

AQSh prezıdenti Donald Tramp Pentagonnyń ataýyn «Soǵys mınıstrligi» dep ózgertý týraly Jarlyqqa qol qoıady. Bul týraly Fox News Aq úıdiń sheneýnigine silteme jasap jarııalady, dep habarlaıdy Qandastar.kz.

Aqparatqa sáıkes, qujatta «Soǵys mınıstrligi» ataýy Qorǵanys mınıstrliginiń qosymsha resmı ataýy retinde engizilmek. Sondaı-aq vedomstvo basshysy úshin «soǵys mınıstri» ataýy da qoldanylady. Qazirgi ýaqytta Pentagondy Pıt Hegset basqarady.

Buǵan deıin The Wall Street Journal Aq úıde Tramptyń ekinshi merziminiń alǵashqy kúnderinen bastap Pentagon men onyń basshysynyń ataýyn ózgertýge qatysty «zańnamalyq usynystar» daıyndala bastaǵanyn jazǵan. Basylym málimetinshe, bul ózgeristerdi Kongress maquldaýynsyz júzege asyrý joldary qarastyrylyp jatyr.