ترامپ پۋتين مەن زەلەنسكيدىڭ كەزدەسۋىن ۇيىمداستىرۋعا دايىندىق باستالعانىن مالىمدەدى

فوتو: AFP/Alessandro Della Valle/Pool/Mikhail Metzel

ۋكراينا پرەزيدەنتى ۆلاديمير زەلەنسكي مەن بىرقاتار ەۋروپا مەملەكەتتەرىنىڭ باسشىلارى اقش پرەزيدەنتى دونالد ترامپپەن اق ۇيدە ۋكرايناداعى سوعىستى اياقتاۋ جونىندە كەلىسسوزدەر جۇرگىزدى, دەپ جازدى qandastar.kz

بۇل تۋرالى Stan.kz اقپارات اگەنتتىگى DW.com باسىلىمىنا سىلتەمە جاساپ حابارلايدى.

ۆلاديمير زەلەنسكي مەن دونالد ترامپ اق ۇيدە باسپاسوز كونفەرەنتسياسىن وتكىزدى. اقش پرەزيدەنتى بۇگىنگى كەلىسسوزدەر ءساتتى وتسە, رەسەي, ۋكراينا جانە امەريكا قۇراما شتاتتارىنىڭ قاتىسۋىمەن ۇشجاقتى كەزدەسۋ وتكىزۋدى جوسپارلاپ وتىرعانىن ايتتى. ال ۋكراينا باسشىسى سوعىس اياقتالعان سوڭ سايلاۋ وتكىزۋگە دايىن ەكەنىن جەتكىزدى.

مەملەكەت جانە ۇكىمەت باسشىلارىنىڭ ورتاق بريفينگىندە گەرمانيا كانتسلەرى فريدريح مەرتس اقش, ۋكراينا جانە رەسەي اراسىنداعى ۇشجاقتى كەزدەسۋگە دەيىن اتىستى توقتاتۋعا قول جەتكىزۋگە شاقىردى.

اقش پەن رەسەي پرەزيدەنتتەرى ترامپ پەن ءپۋتيننىڭ 15 تامىزدا الياسكادا وتكەن كەزدەسۋىنەن كەيىن مىندەتتى تۇردە كەلىسسوز وتكىزۋ كەرەك بولدى.

زەلەنسكي جانە ەۋروپالىق كوشباسشىلارمەن وتكەن كەلىسسوزدەردەن سوڭ ترامپ پۋتين مەن زەلەنسكيدىڭ كەزدەسۋىنە دايىندىق باستالعانىن, ودان كەيىن ءوز قاتىسۋىمەن ۇشجاقتى سامميت وتەتىنىن جاريالادى. مەرتستىڭ ايتۋىنشا, پۋتين مەن زەلەنسكيدىڭ كەلىسسوزى ەكى اپتا ىشىندە ءوتۋى ءتيىس.

الايدا ۋكراينا بەيبىت كەلىسسوزدەر جۇرگىزۋ ءۇشىن اتىستى توقتاتۋدى تالاپ ەتپەيدى.

“ەگەر ۋكراينا كەزدەسۋ وتكىزۋ ءۇشىن قانداي دا ءبىر عالامدىق, ەش شارتسىز, ءادىل تالاپ قويسا, مىسالى اتىستى توقتاتۋدى تالاپ ەتە باستاسا, رەسەي ءوز تاراپىنان ءجۇز ءتۇرلى تالاپ قويادى. سوندىقتان مەنىڭ ويىمشا, ەشقانداي شارت قويماستان كەزدەسىپ, سوعىستى اياقتاۋ جولىنىڭ قالاي داميتىنىن ويلاسۋىمىز كەرەك”, – دەدى ۋكراينا پرەزيدەنتى.

ەسكە ساليىق, بۇعان دەيىن ۆلاديمير زەلەنسكي مەن دونالد ترامپ رەسەي مەن اقش سامميتىنەن كەيىنگى العاش رەت كەزدەستى.