ترامپ ءۇزىلىس جاريالاپ, مۇناي باعاسى قۇلدىراۋىن توقتاتتى

فوتو: pixabay

دونالد ترامپتىڭ تاريفتەرگە قاتىستى 90 كۇنگە «دەمالىس» جاريالاعانى تۋرالى جاڭالىقتان كەيىن ءبىر تۇندە Brent ماركالى مۇنايدىڭ ءبىر باررەلى 60-تان 65 دوللارعا كوتەرىلىپ, بىرنەشە كۇنگى قۇلدىراۋدان كەيىن ازداپ «باسىن تىكتەدى». الايدا تاڭەرتەڭ باعا 64 دوللارعا قايتا ازداپ تومەندەدى, دەپ حابارلايدى qandastar.kz

ناقتىراق ايتقاندا, اقش پرەزيدەنتى ءوزى ەنگىزگەن جاڭا تاريفتەردى 75 ەلگە قاتىستى ۋاقىتشا توقتاتتى. ولار — قىتاي مەن ەۋروپالىق وداق سەكىلدى قارسى شارا قابىلداماي, كەلىسسوز جۇرگىزۋگە دايىن ەكەندىكتەرىن بىلدىرگەن ەلدەر. ال قىتاي يمپورتتارىنا ەنگىزىلگەن باج سالىعى كۇن وتكەن سايىن زورايىپ, 125%-عا ءبىر-اق جەتتى. بۇعان اقش اكىمشىلىگى «قۇرمەت تانىتپاۋ» جانە پەكيننىڭ شاعىلىستىرۋ تاسىلىنە جۇگىنۋى تۇرتكى ەكەنىن ايتادى. قالاي بولعاندا دا ناق وسى شارا الەمدىك نارىقتارداعى باعالارعا, ءتىپتى ءىرى كورپوراتسيا اكتسيالارىنىڭ قۇنىنا دا تەرىس اسەر ەتۋدە. بۇل جايت, اسىرەسە, مۇناي تابىسىنا بايلانعان قازاقستاندى دا ساستىرۋدا. كەشە كەشكىسىن مەملەكەت باسشىسى قاسىم-جومارت توقاەۆ ۇكىمەت باسشىسى مەن ۇلتتىق بانك توراعاسىنىڭ قاتىسۋىمەن شۇعىل جيىن وتكىزدى.  جيىندا الەمدىك نارىقتاعى تاريفتىك قاقتىعىستاردىڭ سالدارىنان ەنەرگەتيكا رەسۋرستارى جانە نەگىزگى تاۋارلار باعاسىنىڭ قۇلدىراۋىنا بايلانىستى ەل ەكونوميكاسىندا قالىپتاسقان احۋال قارالدى. ال ۇكىمەت ەل دامۋىنىڭ پەسسيميستىك ستسەناريىن ازىرلەۋدى قولعا الدى. وندا دا مۇنايدىڭ ءبىر باررەلى 55-50 دوللار بولعان جاعدايدا دەگەنگە دايىندىق تۇرعىسىندا.

ساياساتتانۋشى عازيز ابىشەۆتىڭ پىكىرىنشە, مۇناي باعاسىنداعى وزگەرىستەرگە ساۋدا سوعىسى اسەر ەتتى دەپ ەسەپتەيدى.

«دونالد ترامپ ساۋدا سوعىسىن 90 كۇنگە توقتاتىپ قويدى. وسىدان كەيىن Brent مۇنايىنىڭ باعاسى بىردەن 64 دوللارعا كوتەرىلدى. ءسىرا, جاھاندىق ساۋدا سوعىسى تىم كوپ ماڭىزدى مۇددەلەرگە اسەر ەتكەن سياقتى», – دەيدى ساياساتتانۋشى.

ال ەكونوميست عالىمجان ايتقازين مۇناي باعاسىنىڭ ازداپ كوتەرىلۋى مەن ترامپتىڭ سوڭعى شەشىمى عالامدىق رەتسەسسيا قاۋىپ-قاتەرى تومەندەپ, ساۋدا-ساتتىق اعىنى قالپىنا كەلەدى دەگەن ءۇمىت وتىن تۇتاندىراتىن بەلگىلى ەكەنىن ايتادى.

«ارينە, ترامپ جاريالاعان ءۇزىلىس كەلىسسوزدەرگە مۇمكىندىك بەرەدى, بىراق جاعدايدىڭ قايتا ۋشىعۋىنا كەپىلدىك بولا المايدى. ويتكەنى اقش پەن قىتاي اراسىنداعى ساۋدا شيەلەنىسى ءالى ساقتالىپ وتىر, دەمەك عالامدىق ەكونوميكاعا قاتىستى قاۋىپ-قاتەر دە ءالى تولىعىمەن سەيىلگەن جوق. الداعى اپتادا, مەنىڭشە, نارىقتاعى جاعدايلاردان گورى, كەلىسسوزدەر حاتتامالارى الدەقايدا ەرەكشە ءرول اتقاراتىن بولادى», — دەيدى ول.

Dalanews.kz. حابارلاعانداي, Goldman Sachs ترامپتىڭ تاريفتەر بويىنشا ءۇزىلىس جاريالاعانى تۋرالى مالىمدەمەسىنەن سوڭ ءوز بولجامىن جاريالادى.

«قازىر ءبىز رەتسەسسيانى قاراستىرمايتىن بازالىق بولجامىمىزعا قايتا ورالۋدامىز. وعان سايكەس, 2025 جىلى ءجىو ءوسىمى — 4Q, ينفلياتسيا — 3,5%, رەتسەسسيا ىقتيمالدىلىعى 45% دەپ بولجانادى. ال فەدەرالدى رەزەرۆ بازالىق مولشەرلەمەنى 25 بازالىق پۋنكتەن ماۋسىم, شىلدە, قىركۇيەك ايلارىندا ءۇش رەت قاتارىنان تومەندەتۋى مۇمكىن», دەلىنگەن امەريكالىق ينۆەستيتسيالىق بانكى حابارلاماسىندا.

بۇل دا «الەمدىك نارىقتارداعى الاساپىران باسىلادى» دەپ كوپ كۇتكەن ءۇمىتتى ۇكىلەيدى.

بۇعان دەيىن سايتىمىزدا «مۇنايدىڭ ءبىر باررەلى 40 دوللارعا دەيىن ارزانداۋى مۇمكىن — Goldman Sachs» اتتى ماقالا جاريالانعان بولاتىن.