«ترەند قۋىپ, TikTok تۇسىرسە ءبىلىمدى كىم بەرەدى»: جەلى قولدانۋشىسى «حيت» ديرەكتوردى سىنادى

الەۋمەتتىك جەلىدە شىنار قۇرمانعالي ەسىمدى جەلى قولدانۋشىسى سوڭعى كەزدە ەل اۋزىندا جۇرگەن مەكتەپ ديرەكتورى اقمونشاق نۇرتازا جايلى ءوز ويىن ءبىلدىرىپ, پىكىر قالدىردى, دەپ حابارلايدى Qandastar.kz سايتى Skifnews.kz اقپارات پورتالىنا سىلتەمە جاساپ.

«ءبىزدىڭ قوعامدا بىرەۋ تانىمال  بولسا, شەكتەن تىس “باسىمىزعا كوتەرىپ جىبەرەتىن” ادەت بار. سوڭعى كەزدە TikTok-تا تانىلعان كەيبىر مەكتەپ ديرەكتورلارى مەن ءدىن قىزمەتكەرلەرى قوعامنىڭ ەرەكشە نازارىندا ءجۇر. بىرەۋى ءان ايتىپ, بىرەۋى شوۋعا شىعىپ, ءبىرى ءتىپتى ەل ارالاپ قوناقتان-قوناققا بارىپ ءجۇر. ال جەلىدەگى جۇرت ءماز: “قانداي كرەاتيۆ ديرەكتور, قانداي زاماناۋي يمام!” — دەپ.

الايدا ماسەلەنىڭ ەكىنشى جاعىنا دا قاراپ كورەيىكشى.

مىسالى, اقمونشاق نۇرتازا ەسىمدى مەكتەپ ديرەكتورى ينستاگرامدا ەكى ايدا 200 مىڭعا جۋىق جازىلۋشى جيناپ, قازىر ءىس-شارادان ءىس-شاراعا بارىپ ءجۇر. تاعى ءبىر استانالىق ديرەكتور ينستاگرامعا ءازىل ۆيدەولار سالا باستاعان. كوپ ۇزاماي بۇل ترەندكە وزگە دە مەكتەپ باسشىلارى ىلەسىپ كەتۋى مۇمكىن. ەندى ويلايسىڭ: ەرتەڭ بارلىق ديرەكتورلار TikTok تۇسىرۋمەن, ترەند قۋ, قارالىم جيناۋمەن اۋرە بولسا مەكتەپتى كىم باسقارادى?», — دەدى ول.

ءبىلىم بەرۋ جۇيەسىندە ءدال قازىر باستى ماسەلە – ساپا مەن كادر. “جايلى مەكتەپتەر” سالىنۋدا, بىراق ولاردا جۇمىس ىستەيتىن بىلىكتى مۇعالىمدەر جەتىسپەيدى. ۋنيۆەرسيتەتتەر پەداگوگتاردى جەتكىلىكتى مولشەردە دايىنداپ ۇلگەرمەي جاتىر. ال مەكتەپتەر بوس ورىنداردى تولتىرۋ ءۇشىن كەز كەلگەن “پەداگوگ ديپلومى بار” ادامدى جۇمىسقا الا سالادى. بۇل ساپاعا تىكەلەي اسەر ەتەدى.

«وسىنداي كەزدە مەكتەپ ديرەكتورى – ەڭ الدىمەن باسقارۋشى, جاۋاپتى تۇلعا بولۋى ءتيىس. ونىڭ ۋاقىتى, نازارى, موتيۆاتسياسى كونتەنتكە ەمەس, وقۋ ساپاسى مەن تاربيە جۇمىسىنا باعىتتالۋى قاجەت. TikTok ارقىلى مەكتەپ ابىرويىن كوتەرەمىز دەسەك, ول ۇزاقمەرزىمدى ناتيجە بەرمەيدى.

ايتقىم كەلگەنى:

كرەاتيۆ كەرەك, زاماناۋي بولۋ كەرەك. بىراق ءبىلىم بەرۋ سالاسىنداعى جاۋاپتى تۇلعالار – TikTok جۇلدىزى ەمەس, ساپالى ءبىلىم مەن تاربيەنىڭ كوشباسشىسى بولۋى ءتيىس.

كەلەشەك TikTok-تا ەمەس, مەكتەپتىڭ ىشىندە قالىپتاسادى», — دەپ قورىتىندىلادى ول.