ıfrlyq damý mınıstrligi el aspanynda baıqalǵan beımálim otty nysandardyń ne ekenin aıtty

«5-nen 6 maýsymǵa qaraǵan túni el ortalyǵy jáne soltústiktegi halyq, onyń ishinde Astana, Qaraǵandy, Pavlodar jáne Qostanaı qalalarynyń turǵyndary aspanda jaryq qubylysty baıqady. Aldyn ala málimetter boıynsha, bul orbıtada buryn bolǵan ǵarysh nysandarynyń biriniń atmosferaǵa enýimen baılanysty», delingen mınıstrlik túsiniktemesinde.

Ǵaryshtyq qaldyqtardyń qozǵalysyn baqylaıtyn halyqaralyq uıymdardyń derekterine sáıkes, dál osy ýaqyt aralyǵynda úsh oqıǵa tirkelgen, olardyń árqaısysy baıqalǵan qubylysty týdyrýy múmkin:

1. Qytaıdyń ZQ-2E zymyranynyń údetkish blogy

• Atmosferaǵa ený ýaqyty: 5 maýsym, Astana ýaqytymen shamamen 22:40.
• Nysan: LandSpace kompanııasy 17 mamyrda ushyrǵan Zhuque-2 Enhanced zymyranynyń satysy.
• Ereksheligi: Ekologııalyq taza otyn (suıyq metan men ottegi) paıdalanylady, janý kezinde aıqyn jaryq shyǵarady.

2. STARLINK-1631 (SpaceX) spýtnıgi

• Atmosferaǵa ený ýaqyty: 6 maýsym, Almaty ýaqytymen 03:41.
• Eski spýtnıkterdiń biriniń josparly orbıtadan shyǵýy.

3. Japondyq H-2A R/B zymyranynyń údetkish blogy

•  Atmosferaǵa ený ýaqyty: 6 maýsym, Almaty ýaqytymen 00:36.
• Nysan passıvti orbıtadan shyǵý rejıminde bolǵan.

«Qazirgi tańda Qazaqstan Respýblıkasy aýmaǵyna qandaı da bir fragmentterdiń qulaǵany nemese zalal keltirgeni týraly rastalǵan aqparat joq. Mundaı nysandar, ádette, atmosferada tolyq janyp ketedi (iri bólikterdiń Qazaqstan aýmaǵyna qulaýy ekitalaı), al qubylystyń ózi kórneki bolǵanymen, qaýipsiz úderis bolyp sanalady», delingen habarlamada.

Sondaı-aq, 2025 jyly 5 maýsymda túngi aspanda uzyn-sonar otty beımálim nysan paıda bola salysymen, birinshi bolyp Qorǵanys mınıstrligi de aqparat taratqan edi.

QR Qorǵanys mınıstrligi aspanda belgisiz nysandardyń paıda bolýyna qatysty aqparattyń taralýyna baılanysty tómendegini habarlaıdy:

«Qazaqstan Respýblıkasy aýmaǵynda áýe keńistigin buzý faktileri tirkelgen joq. Jaǵdaı tıisti qyzmetterdiń tolyq baqylaýynda. Halyqqa eshqandaı qaýip tónip turǵan joq. Atalǵan qubylys atmosferaǵa enip jatqan ǵaryshtyq apparattardyń qaldyqtaryna nemese meteor aǵynyna uqsaıdy. Mundaı nysandar, ádette, atmosferanyń tyǵyz qabattarynda janyp ketip, jerge jetpeıdi. Azamattardan sabyr saqtaýdy jáne rastalmaǵan aqparat taratpaýdy suraımyz. Quzyrly organdar bul qubylysty zerttep jatyr jáne qajet bolǵan jaǵdaıda resmı túsinikteme beredi».

Buǵan deıin elorda turǵyndary aspanda janyp bara jatqan birneshe belgisiz obektiniń zýlap ótkenin vıdeoǵa túsirip alǵanyn jazǵan edik.