تسيفرلىق كوشپەندىلەردىڭ ورداسى: ءىت مامانداردىڭ اعىلۋى قازاقستانعا نە بەرەدى

سوڭعى كەزدە «تسيفرلىق كوشپەندىلەر» دەگەن ۇعىم پايدا بولدى. ول تىركەس نەگىزىنەن تسيفرلىق تەحنولوگيالار سالاسىندا قاشىقتان ەڭبەك ەتەتىن, جۇمىس ورنىنا بايلانباي, دۇنيە ءجۇزىنىڭ كەز كەلگەن جەرىندە تۇرا بەرەتىن ادامدارعا قاتىستى قولدانىلادى. بىرقاتار مەملەكەت فريلانسەرلەر ءۇشىن تسيفرلىق كوشپەندى نەمەسە Digital Nomad ۆيزاسىن ۇسىنا باستادى. ونى الۋ ءۇشىن بەلگىلى ءبىر دەڭگەيدەگى تابىسىڭدى كورسەتىپ, جەرگىلىكتى تۇرعىنداردىڭ جۇمىسىن «تارتىپ المايتىنىڭدى» دالەلدەۋىڭ كەرەك. مۇنداي ۆيزا بەرۋدى قازاقستان ۇكىمەتى دە قاراستىرىپ جاتىر.