«تۋعان كۇننەن قايتپاعان»: اباي وبلىسىندا اسكەري قىزمەتشىنى پىشاقتاپ ءولتىرىپ كەتكەن

فوتو: ۆيدەودان الىندى

ايىپتاۋ اكتىسىنە سايكەس, اسكەري كوميسسارياتتىڭ قىزمەتكەرى پىشاق جاراقاتىنان مەرت بولعان.

اباي وبلىسى ءۇرجار اۋدانىندا كوز جۇمعان 23 جاستاعى جىگىتتىڭ تۋىستارى تەرگەۋدىڭ ءادىل جۇرگىزىلمەگەنىنە نارازى. راحات رايبەكتىڭ جاقىندارى قىلمىستىق ءىس جان-جاقتى زەرتتەلمەگەنىن ايتادى. ايتۋلارىنشا, كۇدىكتىلەردىڭ بارلىعى قامالماعان, – دەپ حابارلايدى qandastar.kz 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ.

قاڭتاردا راحات رايبەك ءۇرجار اۋداندىق قورعانىس ىستەرى جونىندەگى بولىمىنە جۇمىسقا ورنالاسادى. ون كۇننەن كەيىن 23 جاستاعى اسكەري قىزمەتكەر ارىپتەستەرىمەن تۋعان كۇن تويلاۋعا كەتكەن ەكەن. سول ءتۇنى اۋىلداعى دۇكەننىڭ ماڭىنان ونىڭ ءمايىتى تابىلعان.

ايىپتاۋ اكتىسىنە سايكەس, اسكەري كوميسسارياتتىڭ قىزمەتكەرى پىشاق جاراقاتىنان مەرت بولعان.

“وقيعا نەگىزى ۆوەنكومات عيماراتىندا باستالعان. باۋىرىمدى سول قىزمەتكەرلەر تۋعان كۇنگە شاقىرىپ الادى. ۆوەنكومات عيماراتىندا وتىرىس بولعان. سول وتىرىستان كەيىن باۋىرىم قايتقان جوق. ياعني, سول ۆوەنكومات عيماراتىنان قايتپادى, ولىگى عانا كەلدى”, – دەدى مارقۇمنىڭ اپكەسى شولپان مۇحامەدجانوۆا.

مارقۇمنىڭ اپكەسى ءىنىسىن اسا قاتىگەزدىكپەن پىشاقتاپ ولتىرگەندەردىڭ بارلىعى قاماۋعا الىنبادى دەپ وتىر. وعان قوسا, تەرگەۋدىڭ جان-جاقتى جۇرگىزىلمەگەنىنە سەنىمدى. سوت-مەديتسينالىق ساراپتاماسىنىڭ قورىتىندىسىمەن دە كەلىسپەي, قىلمىستىق ءىستىڭ بابىن اۋىستىرۋدى تالاپ ەتەدى.

“ەڭگەزەردەي جىگىتكە ءبىر ادام 22 جەردەن پىشاق سالۋى مۇمكىن ەمەس. ەكىنشىدەن, وسى قىلمىستى جاسىرىپ وتىرعان بىرنەشە تۇلعا بار. ولار ءىس بويىنشا جاي كۋا رەتىندە جۇرگىزىلىپ وتىر. ولاردى كۇدىكتىلەر قاتارىنا وتكىزۋ كەرەك. ءىس 99-باپتىڭ 1-تارماعى بويىنشا قاراستىرىلىپ جاتىر. ونى 2-تارماققا, ياعني “اسا قاتىگەزدىكپەن ءولتىرۋ” دەپ اۋىستىرۋدى تالاپ ەتەمىز”, – دەدى مارقۇمنىڭ اپكەسى.

قازىر اتىشۋلى ىستە جالعىز ايىپتالۋشى بار. ول اسكەري كوميسسارياتتىڭ جۇرگىزۋشىسى ەكەن.

الماتى اگرارلىق ۋنيۆەرسيتەتىندە وقىعان راحات رايبەك ۇيلەنبەگەن. وتباسىنىڭ جالعىز بالاسى بولعان. قورعانىس سالاسىندا جۇمىس ىستەپ, اسكەري قىزمەتكەر بولۋدى ارمانداعان كورىنەدى.