«Týǵan kúnnen qaıtpaǵan»: Abaı oblysynda áskerı qyzmetshini pyshaqtap óltirip ketken

Foto: vıdeodan alyndy

Aıyptaý aktisine sáıkes, áskerı komıssarıattyń qyzmetkeri pyshaq jaraqatynan mert bolǵan.

Abaı oblysy Úrjar aýdanynda kóz jumǵan 23 jastaǵy jigittiń týystary tergeýdiń ádil júrgizilmegenine narazy. Rahat Raıbektiń jaqyndary qylmystyq is jan-jaqty zerttelmegenin aıtady. Aıtýlarynsha, kúdiktilerdiń barlyǵy qamalmaǵan, – dep habarlaıdy qandastar.kz 31-arnanyń Informbıýro jańalyqtar baǵdarlamasyna silteme jasap.

Qańtarda Rahat Raıbek Úrjar aýdandyq qorǵanys isteri jónindegi bólimine jumysqa ornalasady. On kúnnen keıin 23 jastaǵy áskerı qyzmetker áriptesterimen týǵan kún toılaýǵa ketken eken. Sol túni aýyldaǵy dúkenniń mańynan onyń máıiti tabylǵan.

Aıyptaý aktisine sáıkes, áskerı komıssarıattyń qyzmetkeri pyshaq jaraqatynan mert bolǵan.

“Oqıǵa negizi voenkomat ǵımaratynda bastalǵan. Baýyrymdy sol qyzmetkerler týǵan kúnge shaqyryp alady. Voenkomat ǵımaratynda otyrys bolǵan. Sol otyrystan keıin baýyrym qaıtqan joq. Iaǵnı, sol voenkomat ǵımaratynan qaıtpady, óligi ǵana keldi”, – dedi marqumnyń ápkesi Sholpan Muhamedjanova.

Marqumnyń ápkesi inisin asa qatygezdikpen pyshaqtap óltirgenderdiń barlyǵy qamaýǵa alynbady dep otyr. Oǵan qosa, tergeýdiń jan-jaqty júrgizilmegenine senimdi. Sot-medıınalyq saraptamasynyń qorytyndysymen de kelispeı, qylmystyq istiń babyn aýystyrýdy talap etedi.

“Eńgezerdeı jigitke bir adam 22 jerden pyshaq salýy múmkin emes. Ekinshiden, osy qylmysty jasyryp otyrǵan birneshe tulǵa bar. Olar is boıynsha jaı kýá retinde júrgizilip otyr. Olardy kúdiktiler qataryna ótkizý kerek. Is 99-baptyń 1-tarmaǵy boıynsha qarastyrylyp jatyr. Ony 2-tarmaqqa, ıaǵnı “Asa qatygezdikpen óltirý” dep aýystyrýdy talap etemiz”, – dedi marqumnyń ápkesi.

Qazir atyshýly iste jalǵyz aıyptalýshy bar. Ol áskerı komıssarıattyń júrgizýshisi eken.

Almaty agrarlyq ýnıversıtetinde oqyǵan Rahat Raıbek úılenbegen. Otbasynyń jalǵyz balasy bolǵan. Qorǵanys salasynda jumys istep, áskerı qyzmetker bolýdy armandaǵan kórinedi.