«تۇعىر بىرەۋ, قالعانى تىرەۋ بولادى»: قوعام قايراتكەرى ءۇش تۇعىرلى ءتىل ۇعىمىنا قارسى شىقتى (ۆيدەو)

فوتو: اشىق دەرەككوز

مەملەكەت جانە قوعام قايرەتكەرى, ءتىل جاناشىرى ورازكۇل اسانعازى Qasqa Jol YouTube ارناسىندا قوناقتا بولىپ, بىرنەشە تۇيىتكىلدى ماسەلەنىڭ ءتۇيىنىن تارقاتتى, — دەپ حابارلايدى qandastar.kz   Qazaq Today اقپارات پورتالىنا سىلتەمە جاساپ.

ورازكۇل اسانعازىقىزى «Qazaq coffee» كوفەحاناسىمەن بولعان جاعدايعا قاتىستى پىكىر ءبىلدىردى. ءتىل جاناشىرى حالىقتىڭ قازاق ءتىلىن وسىلاي تالاپ ەتۋىن قوس قولداپ قولدايتىنىن ايتتى. سونىمەن قاتار, وزگەرىستى ءار ادام وزىنەن باستاۋ كەرەك ەكەنىن جەتكىزدى.

«مۇحتار شاحانوۆتىڭ ءبىر ءسوزى بار: «ورىس ءتىلى ەش جەردە شەكتەلىپ جاتقان جوق, بىراق شەتتەتىلىپ جاتىر دەگەن ارىزدار جازادى. ال قازاق ءتىلى ەش جەرگە قولدانىسقا ەنگەن جوق, بىراق ەنبەي جاتىر دەپ ەشكىم ارىزدانبايدى», دەگەن. سول سياقتى ءوز ءتىلىمىزدى تالاپ ەتۋ ءۇشىن بىزگە زاڭ كەرەك جوق, ءبارى وزىمىزگە بايلانىستى. انا سۇتىمەن كەلگەن انا ءتىلىمىز عوي. قازىر قۇدايعا شۇكىر قانشا پاتەرلىك ءۇي بولسا, سونشا قازاق تۇرادى. ءار ادام ءوز ءۇيىنىڭ استىنداعى ءدامحانادان قازاق تىلىندە ءمازىر مەن قازاقشا قىزمەت ەتۋدى سۇراسا, وزگەرىس بولادى. ءتىپتى وزگە ۇلت وكىلدەرى دە قازاق ءتىلىن مەڭگەرىپ الدى, ولارعا ەشقانداي وكپە جوق. ءار ادام كەرەگىن قازاق تىلىندە سۇراسا, ءتىلىمىز وزدىگەن قولدانىسقا ەنىپ كەتەدى», — دەدى ءتىل جاناشىرى.

قوعام قايراتكەرى قازاقستان تاۋەلسىزدىگىن العاننان كەيىن نەدەن قاتەلەسكەنىن دە اشىپ ايتتى. سونداي-اق بيلىك باسىنداعىلارعا ۇندەۋ جولدادى.

«كەڭەس وداعىنىڭ كەزىندە ورىس ءتىلى كەرەمەت دەگەن قاعيدانى ميىنا قۇيىپ العان حالىق ويانۋى كەرەك. قازاق ەكى نارسەسىنە يە بولۋى ءتيىس. ونىڭ بىرەۋى — ءتىل, ەكىنشىسى — ءدىن. وكىنىشكە قاراي, ءبىز وسى تۇستا قاتەلەستىك. ءۇش تۇعىرلى ءتىل دەدىك. ال تۇعىر بىرەۋ بولادى. ءبىر ءتىل تۇعىر, قالعانى تىرەۋ بولادى. ال ءبىز ءتىلدى ۇشكە بولدىك, ءدىندى جۇزگە بولدىك. ءدىنىمىزدىڭ بىرنەشە بولىككە بولىنگەنىن كەشەگى «قاڭتار وقيعاسى» كورسەتتى. جاپون, تۇرىك, اعىلشىن, فرانتسۋز ءتىلى سياقتى قازاق ءتىلىنىڭ دە جاھاندانۋ زامانىنا كىرۋگە قاقىسى بار. بيلىك باسىنداعىلارعا ايتارىم بىزدە بار ءتىلدى, باي ءتىلدى, بەينەلى ءتىلدى ەشكىمنەن كەم قىلماي قولدانىسقا ەنگىزۋدى قولعا الۋ كەرەك», — دەيدى ورازكۇل اسانعازى.