بايدەن ۋكراينانى بۇدان ءارى قاراي دا قولداۋعا دايىن ەكەنىن مالىمدەدى

«ۋكراينا اقش ەكسپورتتايتىن اۋە شابۋىلىنا قارسى ماڭىزدى قورعانىس قوندىرعىلارىنا العاشقىلاردىڭ ءبىرى بولىپ قول جەتكىزۋى ءۇشىن قولدان كەلگەننىڭ ءبارىن جاسايمىز», – دەدى دجو بايدەن.

اق ءۇيدىڭ رەسمي سايتىندا اتالعان ەلدەردىڭ ورتاق مالىمدەمەسى جاريالاندى. وندا كيەۆكە بەرىلەتىن قارۋ – ءتورت بىردەي Patriot اتتى قوسىمشا زەنيتتىك-زىمىراندىق كەشەنى جانە يتالياندىق SAMP-T جۇيەسى ەكەنى ناقتى كورسەتىلگەن. بۇدان بولەك, ۋكرايناعا NASAM, HAWK, IRIS T-SLM, IRIS T-SLS جانە Gepard سەكىلدى اۋە قورعانىسى جۇيەلەرىن جەتكىزۋگە نيەتتى ەكەنىن جاسىرماعان. اقش پەن ونىڭ وداقتاستارى ۋكراينانىڭ اۋە قورعانىسى ءۇشىن جالپى العاندا 1 ميلليارد اقش دوللارىن ءبولۋدى ءوز مويىنىنا الىپ وتىر.

بايدەننىڭ سوزىنە قاراعاندا, ءبىر جىل ىشىندە ۋكراين قالالارىن رەسەي زىمىراندارىنان قورعايتىن جۇزدەگەن قورعانىس قوندىرعىلارى جەتكىزىلىپتى. وداقتاستار كەلەسى جىلى كيەۆكە جۇزدەگەن زىمىران قۇلاتقىش جۇيەلەردى جەتكىزۋگە ۋادە بەردى.

دجو بايدەن ۋكراينانى بۇدان ءارى قاراي دا قولداۋعا دايىن ەكەنىن مالىمدەدى.

«پۋتين ۋكراينانى وزىنە تولىق باعىندىرعىسى كەلەدى, ۋكراينا دەموكراتياسى مەن مادەنيەتىن قۇرتىپ, ونى كارتادان تۇتاس جويعىسى كەلەدى. پۋتين مۇنىمەن توقتامايتىنىن بىلەمىز. بىراق جاڭىلىسۋدىڭ دا كەرەگى جوق: ۋكراينا ءپۋتيندى توقتاتا الادى جانە توقتاتادى دا», – دەپ مالىمدەدى بايدەن.

سەيسەنبى كۇنى ۋكراينا پرەزيدەنتى ۆلاديمير زەلەنسكي ۆاشينگتونعا ۇشىپ كەلدى. دەسە دە, ول بۇل كومەكتى مىسە تۇتىپ وتىرعان جوق. بايدەننىڭ بۇل جالىندى سوزدەرى كوڭىلىنەن شىقپاعانى دا اڭعارىلادى. باتىستان «تۇيە سۇراپ, بيە الىپ» جۇرگەن نارازىلىعىن دا جاسىرمادى.

زەلەنسكيدىڭ پىكىرىنشە, اقش بولگەن Patriot-تاردىڭ كومەگى بار, بىراق جەتكىلىكسىز. اۋەدەگى ايقاس ءۇشىن جوق دەگەندە ۋكرايناعا 128 F-16 جويعىش ۇشاقتارى كەرەك ەكەن.

«F-16 ماسەلەسى ولاردىڭ سانى مەن جەتكىزىلۋ ۋاقىتىندا بولىپ وتىر. جاقاۋراتپاي اشىعىن ايتايىقشى, F-16 تۋرالى شەشىم بولعان. رەسەي كۇن سايىن ۋكرايناعا قارسى 300 ۇشاقپەن ۇرىس سالىپ جاتىر. بىزدەگى شەشىم 10-20 ۇشاقتىڭ توڭىرەگىندە عانا. ءتىپتى, ەلۋ ۇشاقتىڭ ءوزى تۇككە تاتىمايدى. ءبىز قورعانىپ جاتىرمىز. سوندىقتان بىزگە 128 ۇشاق كەرەك», – دەيدى زەلەنسكي.

ونىڭ ايتۋىنشا, مۇنشاما ۇشاقسىز اۋەدە رەسەيگە قارسى توتەپ بەرۋ – قيىننىڭ قيىنى. زەلەنسكي ورىس اسكەرىن ۋكراينانىڭ وڭتۇستىگىنەن تىقسىرۋعا بولاتىنىن, بىراق ول ءۇشىن ۋكراينانىڭ قولدا بار الىسقا اتاتىن قارۋى ماردىمسىز ەكەنىن ايتتى.

«جىلاندى جەتى كەسسە دە, كەسىرتكەدەي قاۋقارى بولادى» دەگەن, رەسەيىڭ دە وڭاي شاعىلاتىن جاڭعاق ەمەس. Reuters اگەنتتىگىنىڭ ەسەبىنشە, كرەملدىڭ اسكەري ەكونوميكانى كەم دەگەندە 3-4 جىل ۇستاپ تۇرۋعا شاماسى بار. عايىپتان تايىپ, اياق استىنان رايىنان قايتپاسا, بۇل – سوعىستىڭ وسىنشا ۋاقىتقا سوزىلار ءتۇرى بار دەگەن ءسوز. دەسە دە, رەسەيدىڭ دە تۇيتكىلى از ەمەس. وق-ءدارى مەن اسكەر سانىنىڭ جەتىسپەۋشىلىگى كەڭ كولەمدى شابۋىل باستاۋعا مۇرشا بەرمەي تۇرعان جايى بار.

ايتالىق, رەسەي اي سايىن 30 مىڭ ادامدى اسكەر قاتارىنا شاقىرادى. بۇل مايداندا اسكەردى وڭدى-سولدى شىعىنداۋعا مۇمكىندىك بەرىپ وتىر. بىراق كەيبىر ايماقتاردا تاجىريبەسىز, تولىق ەمەس بولىمدەرگە ورىندالۋى قيىن مىندەتتى اتقارۋعا بۇيرىق بەرىلىپ جاتقانى بايقالادى.

«ناعىز شابۋىل وپەراتسياسىن وتكىزۋ ءۇشىن رەسەي باسقا ەلدەردەن وق-ءدارى الۋى ءتيىس. قازىردىڭ وزىندە ونى رەسەي يران مەن سولتۇستىك كورەيادان اكەلىپ جاتىر. ءپۋتيننىڭ ەندى قايتادان جاپپاي موبيليزاتسيا جاريالاۋعا پارمەن بەرۋدەن باسقا امالى جوق», – دەيدى Reuters-كە پىكىر بىلدىرگەن امەريكالىق اسكەري شەنەۋنىك.

ونىڭ سوزىنە سەنسەك, ۋكراينا قورعانىسىن سوڭعى كەزدەرى ءبىرشاما جاقسارتىپ العان. بىراق مايدانداعى اسكەر شىعىنى از دەۋگە كەلمەيدى. سوندىقتان كەڭ كولەمدى شابۋىلعا كوشۋ ءۇشىن بۇل ەلگە ءبىرشاما ۋاقىت پەن كوپ كۇش كەرەك.