Baıden Ýkraınany budan ári qaraı da qoldaýǵa daıyn ekenin málimdedi

«Ýkraına AQSh eksporttaıtyn áýe shabýylyna qarsy mańyzdy qorǵanys qondyrǵylaryna alǵashqylardyń biri bolyp qol jetkizýi úshin qoldan kelgenniń bárin jasaımyz», – dedi Djo Baıden.

Aq úıdiń resmı saıtynda atalǵan elderdiń ortaq málimdemesi jarııalandy. Onda Kıevke beriletin qarý – tórt birdeı Patriot atty qosymsha zenıttik-zymyrandyq kesheni jáne ıtalıandyq SAMP-T júıesi ekeni naqty kórsetilgen. Budan bólek, Ýkraınaǵa NASAM, HAWK, IRIS T-SLM, IRIS T-SLS jáne Gepard sekildi áýe qorǵanysy júıelerin jetkizýge nıetti ekenin jasyrmaǵan. AQSh pen onyń odaqtastary Ýkraınanyń áýe qorǵanysy úshin jalpy alǵanda 1 mıllıard AQSh dollaryn bólýdi óz moıynyna alyp otyr.

Baıdenniń sózine qaraǵanda, bir jyl ishinde ýkraın qalalaryn Reseı zymyrandarynan qorǵaıtyn júzdegen qorǵanys qondyrǵylary jetkizilipti. Odaqtastar kelesi jyly Kıevke júzdegen zymyran qulatqysh júıelerdi jetkizýge ýáde berdi.

Djo Baıden Ýkraınany budan ári qaraı da qoldaýǵa daıyn ekenin málimdedi.

«Pýtın Ýkraınany ózine tolyq baǵyndyrǵysy keledi, Ýkraına demokratııasy men mádenıetin qurtyp, ony kartadan tutas joıǵysy keledi. Pýtın munymen toqtamaıtynyn bilemiz. Biraq jańylysýdyń da keregi joq: Ýkraına Pýtındi toqtata alady jáne toqtatady da», – dep málimdedi Baıden.

Seısenbi kúni Ýkraına prezıdenti Vladımır Zelenskıı Vashıngtonǵa ushyp keldi. Dese de, ol bul kómekti mise tutyp otyrǵan joq. Baıdenniń bul jalyndy sózderi kóńilinen shyqpaǵany da ańǵarylady. Batystan «túıe surap, bıe alyp» júrgen narazylyǵyn da jasyrmady.

Zelenskııdiń pikirinshe, AQSh bólgen Patriot-tardyń kómegi bar, biraq jetkiliksiz. Áýedegi aıqas úshin joq degende Ýkraınaǵa 128 F-16 joıǵysh ushaqtary kerek eken.

«F-16 máselesi olardyń sany men jetkizilý ýaqytynda bolyp otyr. Jaqaýratpaı ashyǵyn aıtaıyqshy, F-16 týraly sheshim bolǵan. Reseı kún saıyn Ýkraınaǵa qarsy 300 ushaqpen urys salyp jatyr. Bizdegi sheshim 10-20 ushaqtyń tóńireginde ǵana. Tipti, elý ushaqtyń ózi túkke tatymaıdy. Biz qorǵanyp jatyrmyz. Sondyqtan bizge 128 ushaq kerek», – deıdi Zelenskıı.

Onyń aıtýynsha, munshama ushaqsyz áýede Reseıge qarsy tótep berý – qıynnyń qıyny. Zelenskıı orys áskerin Ýkraınanyń ońtústiginen tyqsyrýǵa bolatynyn, biraq ol úshin Ýkraınanyń qolda bar alysqa atatyn qarýy mardymsyz ekenin aıtty.

«Jylandy jeti kesse de, kesirtkedeı qaýqary bolady» degen, Reseıiń de ońaı shaǵylatyn jańǵaq emes. Reuters agenttiginiń esebinshe, Kremldiń áskerı ekonomıkany kem degende 3-4 jyl ustap turýǵa shamasy bar. Ǵaıyptan taıyp, aıaq astynan raıynan qaıtpasa, bul – soǵystyń osynsha ýaqytqa sozylar túri bar degen sóz. Dese de, Reseıdiń de túıtkili az emes. Oq-dári men ásker sanynyń jetispeýshiligi keń kólemdi shabýyl bastaýǵa mursha bermeı turǵan jaıy bar.

Aıtalyq, Reseı aı saıyn 30 myń adamdy ásker qataryna shaqyrady. Bul maıdanda áskerdi ońdy-soldy shyǵyndaýǵa múmkindik berip otyr. Biraq keıbir aımaqtarda tájirıbesiz, tolyq emes bólimderge oryndalýy qıyn mindetti atqarýǵa buıryq berilip jatqany baıqalady.

«Naǵyz shabýyl operaııasyn ótkizý úshin Reseı basqa elderden oq-dári alýy tıis. Qazirdiń ózinde ony Reseı Iran men Soltústik Koreıadan ákelip jatyr. Pýtınniń endi qaıtadan jappaı mobılızaııa jarııalaýǵa pármen berýden basqa amaly joq», – deıdi Reuters-ke pikir bildirgen amerıkalyq áskerı sheneýnik.

Onyń sózine sensek, Ýkraına qorǵanysyn sońǵy kezderi birshama jaqsartyp alǵan. Biraq maıdandaǵy ásker shyǵyny az deýge kelmeıdi. Sondyqtan keń kólemdi shabýylǵa kóshý úshin bul elge birshama ýaqyt pen kóp kúsh kerek.