«تۇقىم العىش بولساڭدار, اكادەميك اسقار جۇمادىلداەۆ سەكىلدى ازاماتتاردان تۇقىم الىپ قالساڭىزدارشى» – ءومىر شىنىبەك ۇلى

فوتو: ALASH.KZ 

«سپورت كەرەك, ارينە. ەلدوستىڭ جەڭىسى ءبارىمىز ءۇشىن ماقتانىش. بىراق «ءبىلىمدى مىڭدى جىعاتىن» زاماندا ۇلتتىڭ گەنوفوندى اسقار جۇمادىلداەۆ سەكىلدى ازاماتتاردان قۇرالۋى ءتيىس». بۇل پىكىردى بەلگىلى ۇستاز, تاريحشى ءومىر شىنىبەك ۇلى ALASH.KZ ۇلتتىق پورتالىنا بەرگەن سۇحباتىندا ايتتى.

«تۇقىم العىش بولساڭدار, اكادەميك اسقار جۇمادىلداەۆ سەكىلدى ازاماتتاردان تۇقىم الىپ قالساڭىزدارشى. سپورت كەرەك, ارينە. ەلدوستىڭ جەڭىسى ءبارىمىز ءۇشىن ماقتانىش. بىراق «ءبىلىمدى مىڭدى جىعاتىن» زاماندا ۇلتتىڭ گەنوفوندى اسقار جۇمادىلداەۆ سەكىلدى ازاماتتاردان قۇرالۋى ءتيىس. قازىر بىزدە عالىمداردان گورى ونەر ادامدارى, توي انشىلەرى الدەقايدا باي-قۋاتتى تۇرادى. سپورتشىلاردىڭ دا جاعدايى جامان ەمەس. وليمپيادادا التىن العانى ءۇشىن سپورتشىلارعا قوماقتى اقشا بەرىلەتىنىن بىلەمىز. الەۋمەتتىك جەلىدەگى داۋ-داماي ءالى الدا. سول كەزدە دە ءتۇرلى پىكىرلەر تۋىندايدى. ەلىمىزدە تەحنيكا, جاراتىلىستانۋ عىلىمدارى كەنجەلەپ قالعان. بالالار دا بۇل ماماندىقتاردى سيرەك تاڭدايدى. سوندىقتان بىزگە عىلىمنىڭ وسى سالالارىن كوبىرەك ناسيحاتتاۋ كەرەك. ءوندىرىسىمىز دامىسىن دەسەك, تەحنيك, ماتەماتيك, فيزيك, حيميك عالىمدارىمىزدى كوبىرەك دارىپتەپ, ولارعا بارلىق جاعدايدى جاساۋىمىز قاجەت. جاستار وسى ماماندىقتارعا قىزىعاتىنداي, عىلىمعا ۇمتىلاتىنداي بارىنشا قولداۋ كورسەتۋىمىز قاجەت. بۇل ەلدىڭ بولاشاعى ءۇشىن وتە ماڭىزدى. ارينە, سپورتشىلارىمىزدى ماقتان تۇتۋىمىز قاجەت. ولار دا ەلىمىز ءۇشىن وتە ماڭىزدى. بىراق, عالىمداردى دا ۇمىتپاۋىمىز كەرەك. جۋىردا الەۋمەتتىك جەلىدەن 90 جاسقا تاياپ قالعان تەحنيكا عىلىمدارىنىڭ دوكتورى, پروفەسسور اجەيدى سوت ورىنداۋشىلارى ءوز ۇيىنەن شىعارىپ جىبەرگەن ۆيدەونى كورىپ, جۇرەگىم اۋىرىپ, جانىم كۇيزەلدى. كەزىندە قانشاما ينجەنەر ماماندى تاربيەلەپ شىعارعان سول كىسى قازىر قارتايعان شاعىندا ەشكىمگە كەرەك بولماي, بالالارىنىڭ قاتەلىگىنەن ءۇيسىز قالدى. ءبىز مۇنداي جاعدايعا جول بەرمەۋىمىز كەرەك», – دەدى ءومىر شىنىبەك ۇلى.

ەستەرىڭىزگە سالا كەتەيىك, كۇنى كەشە باق كەڭىستىگىندە بەلگىلى سپورت ءجۋرناليسى نەسىپ جۇنىسباەۆتىڭ وليمپيادا چەمپيونى ەلدوس سمەتوۆكە ماتەريالدىق دۇنيە سىيلاي بەرگەندى توقتاتىپ, ونىڭ ورنىنا «ەلدوستا 30 ۇل مەن 40 قىز بولۋى كەرەك. مۇنداي اسىل جىگىتتىڭ ۇرپاعى مول بولۋعا ءتيىس. مال بايلىق ەمەس, ۇرپاق بايلىق» دەگەن پىكىرى تارالىپ, قىزۋ تالقىلانعان بولاتىن.