«تۇقىمىڭمەن قۇرتام دەپ قورقىتتى»: جانار ايجانوۆا جەلىدە تاراعان فوتوسىنا قاتىستى پىكىر ءبىلدىردى

فوتو: اشىق دەرەككوز

بەلگىلى ءانشى جانار ايجانوۆا تالعارداعى قىلمىستىق توپتىڭ باسشىسى دەپ جۇرگەن اداممەن بىرگە تۇسكەن سۋرەتىنە تۇسىنىكتەمە بەرىپ, وعان جەلىدە الدەكىمدەر بۋللينگ جاساپ جۇرگەنىن ايتتى, دەپ حابارلايدى Qandastar.kz Azattyq Rýhy سايتىنا سىلتەمە جاساپ.

«حاسان دەگەن بالە بولدى. جەلكەمنەن كەلىپ سۋرەتكە تۇسكەن ەكەن كەزىندە. مەن ەندى ارقامنان كەلىپ سۋرەتكە تۇسكەن ادامدارعا جاۋاپ بەرمەيمىن عوي. ماڭدايىندا نە دەپ جازۋلى تۇرعانىن قايدان بىلەيىن. سۋرەتكە تۇسسەك وسى, تۇسپەسە, كوكىرەك دەپ تاعى ايتاسىڭدار. ينتەرۆيۋ بەرىپ سايراپ وتىرعان حاساندى قۇدىرەتتەرىڭ جەتسە, بارىپ قول-اياعىن بايلاپ, الدىما الىپ كەلىڭدەرشى. مەن وعان دا ايتاتىنىمدى ايتامىن. ءۇش قايناسا سورپاسى قوسىلمايتىن حاساننىڭ ماعان نە قاتىسى بار? سەندەر ايتقاننان كەيىن ءبىلىپ جاتىرمىن ونىڭ حاسان ەكەنىن. ءبىر تومپيعان بالا ارتىمدا تۇر. ول قاي جىلى, قاي جەردە تۇسكەن سۋرەت ەكەنىن قۇداي بىلەدى. قاسىندا تاعى باسقا دا انشىلەر وتىر», — دەدى جانار ايجانوۆا.

وسىلايشا ءانشى تالعارداعى قاندى وقيعادان كەيىن وزىنە نەگاتيۆ پىكىر جازاتىنداردىڭ كوبەيگەنىن ايتقان. جانار ايجانوۆا سول ادامنىڭ ۇستىنەن ارىز جازىپ, ەلگە كورسەتەمىن دەيدى.

جانار ايجانوۆا ءوزىنىڭ ءىنىسىن 12 جىل بۇرىن اتاقتى كىسىلەردىڭ ءولتىرىپ كەتكەنىن ايتىپ, شەرزاتتىڭ جاقىندارىنىڭ جاعدايىن تۇسىنەمىن دەيدى.

«ماعان ءبىر ايەل جازىپتى, «ۇيىڭدەگى الدەقانداي قىلىپ ءوسىرىپ وتىرعان نەمەرەڭدى وسكەن كەزدە بانديتتەر باۋىزداپ ءولتىرسىن, مەن سونى تىلەيمىن» دەپتى. سوندا سەندەر قانداي اناسىڭدار? اۋىزدارىڭا كەلگەندى وتتاپ جاتىرسىڭدار. قىزىمدى جەردەن الىپ, جەرگە سالىپ جاتىر. مەن ەشكىمگە ەشتەڭە دەگەن جوقپىن عوي. مەن مۇنداي نارسەنى جاقسى تۇسىنەمىن. 12 جىل بۇرىن مەنىڭ دە ءىنىمدى ءولتىرىپ كەتكەن. اتاقتى ادامدار ەكەن, ىستەمەگەندەرى جوق. مەن ەشكىمدى شۋلاتقان جوقپىن عوي. ءوزىم شەشتىم. مەنى دە تۇقىمىڭمەن قۇرتام دەپ قورقىتقان. بىرەۋدىڭ بالاسىنا ءولىم تىلەپ وتىرعاندار: سولاردان قاي جەرلەرىڭ ارتىق? مەن ەشكىمنىڭ وتباسىنا ارالاسپايمىن. نە ىستەيسىڭدەر ماعان?», — دەدى ول.

ەسكە سالايىق, 4 قازان كۇنى تالعار قالاسىندا بولعان قايعىلى جاعداي قوعامدا ۇلكەن رەزونانس تۋدىردى. 16 جاستاعى شەرزاتتىڭ ولىمىنە قاتىستى ءىس ىشكى ىستەر ءمينيسترىنىڭ جەكە باقىلاۋىندا. كەيىن مارقۇمنىڭ وتباسى تۇراتىن ءۇيدى ورتەپ جىبەردى.