«تۋرا ازاپتايتىن جەر دەرسىڭ»: الماتىدا قارتتار ءۇيىن پانالاعان زەينەتكەر ءبىراز بىلىقتىڭ بەتىن اشتى

الماتىداعى قارتتار ۇيىندەگى كەيۋانا مەكەمە قىزمەتكەرلەرىنىڭ جۇمىسىنا شاعىمداندى. قاريانىڭ جانايقايى جازىلعان بەينەجازبا الەۋمەتتىك جەلىدە تارادى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

بەينەجازبادا قاريانىڭ بەت-الپەتى كورسەتىلمەگەن. ول قارتتار ءۇيىنىڭ قىزمەتكەرلەرى قاريالارعا سەلقوس قارايتىنىن, ءتىپتى كۇش كورسەتەتىنىن ايتتى.

“مەن مۇنداي نارسەگە ۇيرەنبەگەنمىن. ولار كۇش كورسەتىپ, قاتىگەزدىك تانىتقانى سونداي, ىستەگەندەرى ادامشىلىققا جاتپايدى. مەنىڭ سۋ ىشكىم كەلەدى, بىراق وعان دا جەتە المادىم. تەكسەرىلەيىن دەپ دارىگەر شاقىرامىن. بىراق ەشكىمنىڭ قاراعىسى جوق, ءتىپتى كومەكتەسپەيدى. مۇنىڭ ءبارىن ىستەپ وتىرعان ميرا ەسىمدى سانيتار ايەل. مەنى قالاي كىرگىزگەنىن كوردىڭىزدەر. ول مەنى وزىنىڭ ءسوزى جۇرەتىن جەرگە كىرگىزىپ الادى. ءبارى سونى تىڭدايدى, سوعان باعىنادى. ال ول ايعايلاعاننان باسقا ەشتەڭە بىلمەيدى. تۋرا ازاپتايتىن جەر دەرسىڭ”, – دەيدى قاريا.

جەلىدە تاراعان ۆيدەوعا قاتىستى قارتتار ءۇيىنىڭ باسشىسى پىكىر ءبىلدىردى.

“2024 جىلعى 26 تامىزدا ورتالىقتا مادەني ۇيىمداستىرۋشى بولىپ قىزمەت ەتەتىن ا قاريا ب-نىڭ دارمەنسىز كۇيدە ەكەنىن پايدالانىپ ونىڭ رۇقساتىنسىز ۆيدەو ءتۇسىرىپ, تاراتىپ جىبەرگەن. ۆيدەوداعى ناۋقاس دەنساۋلىق جاعدايىنا بايلانىستى اۋرۋحانا جاعدايىندا ارناۋلى الەۋمەتتىك قىزمەتكە مۇقتاج ادام رەتىندە ورتالىققا 2023 جىلدىڭ تامىز ايىندا تۇسكەن. ايەل الى كۇنگە دەيىن «شاڭىراق» ورتالىعىندا تۇرادى جانە وسى ۋاقىتقا دەيىن بىردە-ءبىر شاعىمى بولماعان”, – دەپ مالىمدەمە جاسادى مەكەمە.

ورتالىقتىڭ مالىمەتىنشە, ناۋقاسقا تاماق, ەمدىك شارالار, كيىم-كەشەك جانە گيگيەنالىق قۇرالدار سەكىلدى ارناۋلى الەۋمەتتىك قىزمەتتەر ستاندارتتارعا سايكەس تەگىن كورسەتىلەدى.

“وكىنىشكە قاراي, ۆيدەو اۆتورى اراگىدىك قاريالاردى, ونىڭ ىشىندە تۇلعالىق اۋىتقۋلارى بار ناۋقاستاردى جەكە ماقساتتا پايدالانىپ, ولاردى ورتالىق قىزمەتكەرلەرىنە قارسى قويىپ جۇرەدى. جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىلىعى تەكسەرىس جۇرگىزىپ, ناۋقاسپەن سويلەستى. قاريا ەشقانداي شاعىمى جوعىن جانە ورتالىقتىڭ قىزمەتىنە كوڭىلى تولاتىنىن ايتتى”, – دەلىنگەن حابارلامادا.

سونداي-اق مەكەمە ۆيدەو اۆتورىن جالعان اقپارات تاراتقانى ءۇشىن جاۋاپقا تارتاتىنىن ەسكەرتتى.