«Týra azaptaıtyn jer dersiń»: Almatyda qarttar úıin panalaǵan zeınetker biraz bylyqtyń betin ashty

Almatydaǵy qarttar úıindegi keıýana mekeme qyzmetkerleriniń jumysyna shaǵymdandy. Qarııanyń janaıqaıy jazylǵan beınejazba áleýmettik jelide tarady, dep habarlaıdy qandastar.kz Skifnews.kz aqparat portalyna silteme jasap.

Beınejazbada qarııanyń bet-álpeti kórsetilmegen. Ol qarttar úıiniń qyzmetkerleri qarııalarǵa selqos qaraıtynyn, tipti kúsh kórsetetinin aıtty.

“Men mundaı nársege úırenbegenmin. Olar kúsh kórsetip, qatigezdik tanytqany sondaı, istegenderi adamshylyqqa jatpaıdy. Meniń sý ishkim keledi, biraq oǵan da jete almadym. Tekserileıin dep dáriger shaqyramyn. Biraq eshkimniń qaraǵysy joq, tipti kómektespeıdi. Munyń bárin istep otyrǵan Mıra esimdi sanıtar áıel. Meni qalaı kirgizgenin kórdińizder. Ol meni óziniń sózi júretin jerge kirgizip alady. Bári sony tyńdaıdy, soǵan baǵynady. Al ol aıǵaılaǵannan basqa eshteńe bilmeıdi. Týra azaptaıtyn jer dersiń”, – deıdi qarııa.

Jelide taraǵan vıdeoǵa qatysty qarttar úıiniń basshysy pikir bildirdi.

“2024 jylǵy 26 tamyzda ortalyqta mádenı uıymdastyrýshy bolyp qyzmet etetin A qarııa B-nyń dármensiz kúıde ekenin paıdalanyp onyń ruqsatynsyz vıdeo túsirip, taratyp jibergen. Vıdeodaǵy naýqas densaýlyq jaǵdaıyna baılanysty aýrýhana jaǵdaıynda arnaýly áleýmettik qyzmetke muqtaj adam retinde ortalyqqa 2023 jyldyń tamyz aıynda túsken. Áıel áli kúnge deıin «Shańyraq» ortalyǵynda turady jáne osy ýaqytqa deıin birde-bir shaǵymy bolmaǵan”, – dep málimdeme jasady mekeme.

Ortalyqtyń málimetinshe, naýqasqa tamaq, emdik sharalar, kıim-keshek jáne gıgıenalyq quraldar sekildi arnaýly áleýmettik qyzmetter standarttarǵa sáıkes tegin kórsetiledi.

“О́kinishke qaraı, vıdeo avtory aragidik qarııalardy, onyń ishinde tulǵalyq aýytqýlary bar naýqastardy jeke maqsatta paıdalanyp, olardy ortalyq qyzmetkerlerine qarsy qoıyp júredi. Jumyspen qamtý jáne áleýmettik baǵdarlamalar bóliminiń basshylyǵy tekseris júrgizip, naýqaspen sóılesti. Qarııa eshqandaı shaǵymy joǵyn jáne ortalyqtyń qyzmetine kóńili tolatynyn aıtty”, – delingen habarlamada.

Sondaı-aq mekeme vıdeo avtoryn jalǵan aqparat taratqany úshin jaýapqa tartatynyn eskertti.