تۇراقتى تۇردە توسەكتەس بولعان: قايىن اتاسى كەلىنىن زورلاپ, ءبىر بالا تاپقىزعان

قىرعىزستان رەسپۋبليكاسىنىڭ ومبۋدسمەنى دجاميليا دجامانباەۆا 20 جاستاعى جاس ايەلمەن كەزدەستى. جابىرلەنۋشى ايەلدى قايىن اتاسى زورلاعان, دەپ حابارلايدى Qandastar.kz سايتى Skifnews.kz اقپارات پورتالىنا سىلتەمە جاساپ.

ومبۋدسمەننىڭ مالىمەتىنشە, ايەل العاش رەت زورلىققا ۇشىراعانىن 2024 جىلى ۇيلەنگەننەن كەيىن بايانداعان. ەر ادام وعان پىشاقپەن قاۋىپ توندىرگەن.

«زورلىق ارەكەتتەرى ءبىر جىل بويى جۇيەلى تۇردە قايتالانعان. ال كۇيەۋىنىڭ اناسى (وگەي) بۇل جاعدايعا كوز جۇما قاراپ, ەشقانداي شارا قولدانباعان. كەلىنى جۇكتى بولىپ, ءساۋىردىڭ 11-ىندە بوسانعان, بىراق اۋرۋحانادان شىققاننان كەيىن 15 كۇن وتپەي, قايىن اتاسى قايتادان زورلىق پەن قوقان-لوقى ارقىلى وعان شابۋىل جاساعان. جابىرلەنۋشى بۇل تۋرالى كۇيەۋىنە تەك مامىر ايىندا ايتقان. جىگىت بولعان جاعدايدى بىلگەن سوڭ اكەسىمەن سوزگە كەلگەن, الايدا 51 جاستاعى ي.ە. بالاسىن ۇرىپ-سوققان. بۇدان كەيىن قايىن اتاسى ولاردى 10 كۇندىك دالا جۇمىستارىنا جىبەرگەن. ال جاس جۇپ كەيىن ىستىقكول ايماعىنا قاشىپ كەتكەن. بىراق بالا قايىن اتاسىنىڭ قولىندا قالعان», – دەلىنگەن حابارلامادا.

ىستىقكولدە ازاماتتاردىڭ كومەگىمەن جاس جۇپ قاراكول قالاسىنىڭ پوليتسيا بولىمىنە ءوتىنىش بىلدىرگەن. ولار كەيىن بىشكەكتەگى لەنين اۋداندىق ىشكى ىستەر بولىمىنە جىبەرىلگەن. زورلىق تۋرالى ءوتىنىشتى ولار شىلدە ايىنىڭ سوڭىندا جازعان.

پوليتسيا قىرعىز رەسپۋبليكاسى قىلمىستىق كودەكسىنىڭ 154-بابى («زورلاۋ») بويىنشا قىلمىستىق ءىس قوزعاعان. كۇدىكتى 16 تامىزدا ۇستالعان.

جاس جۇپتىڭ ايتۋىنشا, ولار بالاسىن وتباسىنىڭ قولىنان الۋ ءۇشىن داعدارىس ورتالىعىنا جۇگىنگەن. ورتالىق قىزمەتكەرلەرى بالانىڭ وتە السىرەگەنىن انىقتاپ, ونىڭ جىلاۋعا دا شاماسى كەلمەگەنىن اتاپ وتكەن. بالا جەدەل تۇردە اۋرۋحاناعا جەتكىزىلىپ, جانساقتاۋ بولىمشەسىنە جاتقىزىلعان. الايدا بالا كوپ ۇزاماي كوز جۇمعان. بالا ءولىمى بويىنشا سوت-مەديتسينالىق ساراپتاما تاعايىندالعان, بىراق قازىر ناتيجەلەر ءالى الىنعان جوق.

اكىيكاتشى ينستيتۋتىنىڭ حابارلاۋىنشا, دجاميليا دجامانباەۆا جاس جۇپقا تەگىن زاڭدىق, پسيحولوگيالىق جانە مەديتسينالىق كومەك كورسەتۋ ءۇشىن ءتيىستى ورگاندارعا رەسمي حات جولداعان.

اكىيكاتشى ۋاكىلەتتى مەملەكەتتىك ورگانداردان زارداپ شەككەن ادامنىڭ قۇقىقتارى مەن قاۋىپسىزدىگىن قامتاماسىز ەتۋدى, سونداي-اق ءىستى تولىق ءارى وبەكتيۆتى تەكسەرۋدى تالاپ ەتەدى.